Nongstoiñ, K’Lyngkot 21
Ka ïingbishar Special Judge (POCSO) Nongstoiñ, kala rai pynrem bad pynngat ha ki kyndon aiñ kiba tyngeh ïa uwei u briew halor ka kam thombor ïa ka longrynïeng ka khynnah kata hadien ka jingpeit bniah ïa baroh ki sabut ba la ïoh lum lyngba ka jingwad bniah.
U Superintendent of Police ka West Khasi Hills District ha ka kyrwoh khubor u la pyntip ba ha ka 2 tarik u Risaw, 2024, la ïoh pdiang ïa ka FIR na kawei ka nongujor kaba pyntip ba ka khun kynthei ba dang 17 snem ka rta jong ka, ka la shah leh beijot ha u Skaidinglan Nongphud.
Shuh shuh ka khubor na u SP ka ong ruh ba la register ïa ka case pyrshah ïa u nongshah kynnoh ha thanad Nongstoiñ, Case No. 20(10)2024 hapoh ki Section 5(n)/6 jong ka POCSO Act, la shimti ïa ka jingtohkit hapoh ka jingtohkit u UBSI Besstar Diengdoh jong ka thanad Nongstoiñ, bad hadien ba la pyndep ïa ka jingtohkit, la pynmih ïa ka charge-sheet hapoh ki Section 5(n)/6 jong ka POCSO Act.
Hadien kata, ha ka 27 tarik u Naiwieng, 2025, ka ïingbishar jong u Special Judge (POCSO), Nongstoiñ, hadien ba la bishar bniah ïa baroh ki sakhi bad ki sabut ba la wanrah ha ka por jingtohkit, ka la pynrem ïa u nongshah kynnoh u Skaidinglan Nongphud, da kaba ka la hukum ban set phatok haduh 20 (arphew) snem ryngkat bad ka kuna ba T.50,000/- na ka bynta ka kam bymman kaba hap hapoh Section 6 jong ka POCSO Act.
Ka khubor ka ong ruh ba lada um siew ïa ka kuna, u nongshah pynrem un hap ban shong phatok shuh sa na ka bynta hynriew bnai namar ka kam bymman pyrshah ïa katei ka khynnah kynthei.
