Shillong, K’Lyngkot 21
Kiba shong dukan ha lynti ïaid kjat hakhmat Civil Hospital Shillong, ha ka sngi Balang ki la kynriah noh sha ka jaka kaba ka Sorkar ka la pynshna kyrpang hakhmat ka phyllaw ophis PWD kaba don ha Barik.
Ka jingkynriah jong kiba shong die jingdie hakhmat Civil Hospital ka la pynkylluid ïa ka lynti ïaid kjat hakhmat Civil Hospital bad suk ka leit ka wan.
Haba ïakren bad kine kiba shong dukan hakhmat Civil Hospital ki la pynpaw ïa ka jingsngewkmen ba ka Sorkar ka la ai ïa ka jaka kaba biang bad ki la lait na u slap ka lyer.
Ki la pynpaw ba ha kine ki snem ba ki la shong hakhmat Civil Hospital, ki paidbah ki khñium namar ba ka pynthut ïa ka ïaid ka ïeng hynrei mynta ki la lait na ka jingkhñium ki paidbah.
Kawei ka longkmie ka la ïathuh ba naduh dang khynnah ka la mlien ban shong ha lynti ïaid kjat hynrei ka la ai khublei ïa ka Sorkar kaba la shna kyrpang ïa ka jaka shong die dukan ban lait na ka lyer bad u slap.
Ki la ïathuh ba kiba shong die madan ki don palat 30 ngut hynrei watla ka dang rit ka jaka kin sa ïa pynbeit para ba shong dukan.
Ki la kyntu ïa ki bor Sorkar ba kim dei ban shah ïa kiwei pat ban wan shong die madan ha katei ka jaka namar kan ktah ïa ki hi kiba la kohnguh ban shong ha Barik.
Ki la ong ba lada dei sngi U Blei ne kano-kano ka sngi ym dei ban shah ban leit shong biang hakhmat Civil Hospital.
Ki don jingkyrmen ynda ka Sorkar ka la dep shna pynbha ïa ka Civil Hospital kin sa ïoh ban leit shong biang namar ha Barik ki la ailad ban shong shipor.
