Shillong, K’Lyngkot 21
Kawei ka ïing kaba don ha ka thaiñ Kench’s Trace ha nongbah Shillong, ka la shah tuh haduh saw sien lynter tang ha une u bnai ba mynta.
Katkum ka khubor na ki pulit la ong ba u Saheb Paul Choudhury u la ai ka jingujor ba ka ïing jong u, ka la shah tuh haduh saw sien, kata ha ka 3 tarik, 5, 15 bad 18 tarik mynta u bnai.
Katkum ka jingujor, la ong ba ha ka 3 tarik mynta u bnai, ki runar bym lah ban ithuh ki la prong tuh hapoh ka ïingsah jong u bad ban tuh ïa ka pisa kaba long haduh T,45,000/-. Shuh shuh la ong ba ha ka 5 tarik bad ha ka 15 tarik pat, uwei u runar bym lah ban ithuh u la tuh ïa ka umphniang petrol na ka kali ka jong u. Ïa kane ka kam umphniang, la ïoh ban ring dur ha ka kor CCTV kaba la pyndait.
La ong ba ha ka 18 tarik mynta u bnai, ha ka por kumba 7.36 janmiet, kane kajuh ka ïing ka la shah tuh biang, ha kaba uwei u runar bym lah ban ithuh, u la tuh ïa ki jaiñ na ki lynti rung sha kane ka ïing.
Ha kaba ïadei bad kane ka jingjia, ki pulit ki dang pynlong ka jingtohkit bad ban thwet ïa ki runar kiba donkti ha kane ka kam tuh.
