Shillong, K’Lyngkot 21
Ka Khasi Students’ Union (KSU) Delhi Unit ryngkat ki pulit ka Delhi ki la ïoh ban pyllait im ïa kawei ka samla kynthei na Meghalaya kaba la shah kynnoh ba ka la shah shoh ha ki shynrang kiba la rung jubor sha ka ïingsah jong ka ha Delhi.
Katkum ka kyrwoh ba la phah da ki nongïalam ka KSU Delhi Unit kaba kynthup ïa ka samla Marbiang Khongwir, President bad u samla Nicholas Chyrmang, Secretary ki la ïohpdiang ïa ka jingkyrpad jingïarap na kawei ka khynnah kynthei na Meghalaya kaba la pyntip ba ka para jong ka, kaba trei ha Delhi, ka la shah thombor bad shah shoh ha katto katne ngut ki shynrang ha ka jaka sah jong ka.
Ki la ïathuh ba hadien ka jingwad jingtip kumba shiteng kynta eiei la lap ïa kane ka jaka sah jong ka kynthei kaba la don jingipher dur namar ka la shah shoh ha ki shynrang.
Hadien ba la ïoh ïa kane ka jingtip, ka KSU Delhi Unit ka la pyntip sha ka SPUNER bad ryngkat bad ki pulit ka Malviya Nagar ki la poi sha katei ka jaka bad la lah ban pyllait im ïa ka.
Katkum ka jingkren jong u nongshah kynnoh, u la ong ba ka khynnah kynthei ka la shim pisa na u bad u la leit sha ka jaka sah jong ka namar ba ka la kyntait ban pynphai biang ïa ka pisa.
Hynrei katkum ka jingïathuh kane ka khynnah kynthei ka la pyntip ha ki pulit ba ka la shah shukor bad bthah ban rung sha ka kam khaïi met, namar nyngkong la kular ban aikam bad hadien ba ka la kyntait, la shoh bad thombor ïa ka.
Ha kane ka por, baroh ar ngut, u nongshah kynnoh bad ka nongshah thombor, ki don ha ka jingkhmih jong ki pulit.
Kumta kine ki nongïalam ki la pynpaw ba ki dang trei ryngkat bad ki bor ba dei peit ban pynthikna ba ïa ka khynnah yn phah biang sha ïing hadien ba la dep baroh ki jingdonkam jong ka aiñ.
Kumta ka KSU Delhi Unit ka kyrpad ïa ka Sorkar ba kan shim ïa ki sienjam kiba tyngeh ban khanglad ïa kum kine ki jingjia ha ki por ban wan, bad ka kyntu ïa ki paidbah, khamtam ïa kito kiba wad kam, ba kin pynshisha bha ïa baroh ki jingtip bad ki jingïathuh shuwa ban leit trei shabar jong ka Jylla.
