Shillong, K’Lyngkot 21
Ka BCCI ka la ïoh ïa ka jingïateh kular haduh T.270 klur na ka AI platform Gemini jong ka Google na ka bynta ban kyrshan ïa ka lympung ïalehkai Indian Premier League (IPL) mynta u snem.
Ka ChatGPT kaba ïakhun pyrshah ïa ka Gemini ka dei kawei na ki nongkyrshan jong ka Women’s Premier League kaba dangïaid mynta. “Kane ka jingïateh ka long na ka bynta lai snem bad ka pynskhem ïa ka jingkwah jong ka IPL ha ka pyrthei”, la ong u heh jong ka BCCI.
Na ka liang ka BCCI ka la hap ban wad nongkyrshan na ka bynta ki jersey thymmai ha u snem ba la lah haba ka sorkar India ka la khang pyrshah ïa kawei na ki nongkhalai pisa kum ka Dream11. Ha kaba khatduh, ka Apollo Tyres ka la mih bujli noh ha ka jaka ka Dream11 kum ka nongkyrshan ïa ki jersey, ha kaba ka la ïoh ïa ka hok na ka bynta T.579 klur.
Ka Tata Group ka bat ïa ka hok ban kyrshan ïa ka nam lahduh jong ka IPL, kaba long ka jingïalehkai T20 kaba heh duh ha ka pyrthei.
Ka jingkyrshan kaba thymmai kaba kynthup ïa ka Gemini ka pyni ïa ka jingkiew jong ki rynsan AI ha ka kriket ha India.
Ha u Naiwieng jong u snem ba la dep haba la pynbna ïa ka jingïatreilang jong ka ChatGPT bad ka WPL, u Secretary ka BCCI u Devajit Saikia u la kren shaphang ka jinglong kongsan jong kane ka jingïatreilang.
“Naduh ki nongïalam ha ka pyrthei ha ka AI, ka jingshna bad ki jingdih haduh ki mar ba shaniah jong ki nongthied jong ka ri India, kane ka jingïatreilang kan don ka bynta kaba kongsan ha kaba pynwan dur ïa ka jing-khring ïa ki nongkyrshan bad ban kyrshan ïa ka jingkiew ka kriket jong ki kynthei,” u la bynrap.
Ïa kane ka IPL 2026 yn sdang naduh 26 tarik u Lber haduh 31 tarik u Jymmang mynta u snem.
