Shillong, K’Lyngkot 21
Ki shipai khappud kata ki Border Security Force (BSF) ki la ïoh ban bat noh ïa ki khar Bangladesh kiba dang thmu ban wan kiew sha India bad kito kiba dang thmu ban hiar sha Bangladesh.
Katkum ka khubor na ki pulit la ong ba u Party Commander, D-Coy jong ka Umsyiem BOP, BSF ha East Khasi Hills u la ai ka jingujor ba ha ka miet jong ka 19 tarik mynta u bnai, ki shipai BSF ki la ïoh bat noh ïa kawei ka kali kaba don ïa u registration number ML10-D-5323 ba la ñiah da u Banistar Bamon (28 snem) ha kawei na ki jaka kaba don ha alignment jong ka BP No. 1272/5-S, BOP Pyrdiwah, kaba dang kit ïa ki hynriew ngut ki nong Bangladesh.
Kine ki hynriew ngut ki nong Bangladesh ki dei kiba la tip kyrteng kum Taniya Akhtar (28 snem), Alpona Khatun (39 snem), Mahinur Akhtar (25 snem), Arifa Khatun (29 snem), Shamoli Das (21 snem) bad Zoya Khan (24 snem) kiba dang hiar sha Dawki ban rung sha Bangladesh na India.
Ha kawei pat ka khubor, la ong ba u Party Commander, D-Coy jong ka Umsyiem BOP, BSF ha East Khasi Hills u la ai ka jingujor ba ha ka 20 tarik mynta u bnai, ha ka por kumba 12.10 shiteng synñia, ki shipai BSF ki la ïoh bat ïa kawei ka taksi kaba don ïa u registration number ML05-J-2060 ba la ñiah da u Jestar Mukhim (30 snem) ryngkat bad ka kurim jong u ha kawei ka jaka hapoh ka alignment jong ka BP No. 1272/5-S, BOP Pyrdiwah, kaba dang kit ïa ki saw ngut ki nong Bangladesh kiba la tip kyrteng kum u Hussain Sheikh (51 snem), Md. Siddique (23 snem), Hassan Bishes (28 snem) bad Lipi Begum (45 snem) kiba dang thmu rung tuh sha u pud u sam jong ka India na Bangladesh.
