Mawkyrwat, K’Lyngkot 21
Ka Seng Samla Hima Langrin (SSHL) ka la hiar jurip ïa ka surok intermediate kaba pynïasoh ïa ka Lailad bad Borsora kaba jngai kumba 6 km, ka surok kaba ki paidbah ka dong ka thaiñ ki la angnud ban ïoh surok bha da ki phew tylli ki snem namar ka jingsniew palat ka surok kaba la wanrah jingeh ïa ka leit ka wan ki paidbah.
Ïa kane ka surok la wan ban buh mawnongrim da u Bah Prestone Tynsong na ka bynta ban pynheh bad siang rong ha ryngkat ka jingdonlang u MLA/ MDC ka thaiñ, Bah Pius Marwein lyngba ka skhim Special Assistance States for Capital Investment 2022-23 ha ka mang tyngka kaba T.18 klur.
Hynrei ha kane ka jingjurip, ka Seng Samla Hima Langrin ka la lap ba ïa kane ka surok wat hadien lai snem ka jingwan buh ïa u mawnongrim ym pat shym la sdang ban pyntrei.
Kumta ka Synjuk ka la pynpaw ïa ka jingsngewkhia kaba jur namar ka jingkular u Bah Prestone ban pyndep noh ïa kane ka surok tang hapoh 24 bnai kumba u la pynpaw ha ki lad pathai khubor ka khlem la urlong.
Haba kren sha ki lad pathai khubor u President ka SSHL Bah PS Lyngdoh u la ong, u kynmaw kyndiang ïa ka jingkren u Bah Prestone ba ha ka por ba u wan ban plie ïa u mawnongrim, ha kaba u la ong ba hapoh 24 bnai yn pyndep noh ka jingtrei ïa katei ka surok hynrei kaba sngewsih ka long ba haduh mynta kam shym la urlong.
U la ong ba kane ka surok kam dei kaba tih thymmai hynrei ka dei kaba la don lypa bad kane ka surok ka dei ban pynheh bad ban siang rong bad u la kular ruh ban pyndep hapoh 24 bnai, kumta ki paidbah ki sah ha ka umdum bad ka lyngngoh namar ka jingtrei haduh mynta kam pat sdang.
Kane ka dei kaei kaei kaba ngim lah ban pdiang namar ha katei ka jingïalang u la ong ba un shaniah ha u Bah Pius Marwein ba un shimkhia ban pyndep ïa katei ka kam. “Te ngim tip mano ba shet kylla, u Bah Pius Marwein ne u Bah Prestone Tynsong,” u la ong.
Kumta na ka liang ka Synjuk ka buh ka jingkyntu ïa ka tnat ba dei peit kumjuh ruh ïa u Bah Prestone Tynsong, Myntri ba dei peit ïa ka tnad PWD ba ki dei ban pyndep noh ïa kane ka surok hapoh 6 bnai bad lada ka Sorkar ka dang leh mynthi, ka Synjuk kan sa shim da kiwei ki sienjam wat ban leit tied jingkhang jong ka ïingbishar, ong u Bah PS Lyngdoh.
