Shillong, K’Lyngkot 21
Ka Meghalaya Pradesh Mahila Congress ka la kynnoh ïa ka Sorkar National Democratic Alliance ba ka la pyntlotbor ïa ka jinglaitluid jong ki kynthei ha ka liang ka ïoh ka kot, khamtam eh ka jingpynkylla kyrteng ïa ka MGNREGA, ka la ktah jur ïa ki kynthei.
Ka Lhingkim Haokip, ka General Secretary MPMC ba dang shu thung thymmai ka la ong ba katba ka BJP ka kren shaphang ban pynkup bor ïa ki kynthei lyngba ki campaign kum ka ‘Beti Bachao’, hynrei ka jingkiew dor jong ki marbam, ka jingbym don kam don jam, ka jingpynduh ïa ki skhim jingïarap bad ka jingpynslem ïa ka bainong hapoh ka MGNREGA ki long kiba ym ïahap bad ka jingthmu jong ka.
“Ka jingpynkupbor kam dei ka slogan kum ka ‘Beti Bachao’. Ka jingpynkupbor ka mut Roti, Rozgar Aur Suraksha” ong ka Haokip, haba ban jur ba ka Congress ka ngeit ba ïa ka jingpynkupbor ym lah ban pynkut tang ha ka jingkren.
Ka Haokip ka la kdew ba ki kynthei ki dei kiba shah ktah jur tam ha ka jingkiewdor ki mar ki mata, ka jingnang duna ki skhim, ka bha ka miat, ka jingbym ïohkam ka khate ïa ki jingkyrshan ha ka kamai jakpoh.
Ka la kdew ba bun ki kynthei ki dei ki nongtrei ka MGNREGS bad ka jingpynkylla ïa ka skhim ka la pynjur ïa ka jingeh ha ka ïoh ka kot, ka pynjur ïa ka jingphet shnong ki briew bad ka jingkit ram ki kynthei ha ki thaiñ nongkyndong bad ki riewlum ba kynthup ha Meghalaya.
Shuh-shuh haba kren halor ka MGNREGA, ka Haokip ka la ban jur ba ka Sorkar u Modi ka la pyntroiñ ïa ka skhim, watla ka dei ka hok ba shong aiñ ban ïohkam ba la pynthikna da ka Parliament. “Ka MGNREGA ka dei ka hok, ym ka jingleh sngewbha. Ka jingpyntroiñ ïa ka MGNREGA ka dei ka jingthombor beit-beit ïa ki kynthei, ki nongtrei bad ki nongkyndong ba duk.”
Ka Mahila Congress ka la dawa ïa ka jingsiew bainong ha ka por kaba biang, ka jingai ïa ka mang tyngka kaba pahuh bad ban pyrshah ïa kano-kano ka jingpyntlot ïa ka Act.
Ka Haokip kala pyntip ba ka Mahila Congress kan ïai-bteng ïa ka jingïaleh ban pyrshah ïa ka MGNREGA bad ïakhun pyrshah ïa ki polisi ba buh ha ka jingma ïa ki kynthei, ki nongtrei bad ki briew ba duk.
Ka la pynbna ruh ba ka Mahila Congress kan sa ïalam ban pynlong ka jingïakhih ba jai-jai, ban pynlong ïa ki Awareness Campaign bad rah ïakren ïa ki jingeh ki kynthei ha ki shnong, ha ki surok bad sha ka Ïingdorbar Parliament.
