Chennai, K’lyngkot:
U General Secretary ka AMMK, u TTV Dhinakaran, ha ka sngi Balang, u la wanphai biang sha ka kynhun NDA, hadien ba u la ïakynduh ïa u Piyush Goyal, uba dei u nongïalam ki kam ilekshon jong ka BJP, na ka bynta ka Tamil Nadu. Ïa ka jingdon ki seat ban ai sha ka AMMK ha kane ka ilekshon sha ka ïingdorbar thawaiñ ban wan yn sa rai shen.
Ha shwa ban ïakynduh ïa u Goyal, u Dhinakaran u la pynïaid ïa ka jingïalang jong ki nongkitkam ka AMMK bad pynbna ba ka seng jong u kan pynïasoh noh sha ka NDA.
Haba kylli ïa ka jingïapher jong u bad ka AIADMK, u Dhinakaran u la ong ba ka AMMK ka la shim ïa kane ka rai na ka bynta ka jingmyntoi jong ka Tamil Nadu bad ban wanrah biang ïa ka “Amma Rule” ha ka jylla.
“Da ka jingthmu kaba kham ïar ban ym sahkut ha ki por ba la dep bad buh hakhmat eh ïa ki jingmyntoi jong ka seng bad ïa ka bha ka miat jong ka Tamil Nadu, ngi la rai ban ïasoh bad ka National Democratic Alliance,” bynrap biang u Dhinakaran.
