Shillong, K’Lyngkot 21
Na ka jingpynlong ka Hynñiewtrep Youth’s Council HYC ban khynra drok ha Lum Survey, Ajmera, Them Bijoy, Police Bazar ka la ïoh bat bun ngut ki nongdih drok bad phah ban ïalam sha ki jaka ba ju shong ki nongdih drok.
Ïa kane ka jingkhynra la ïalam da u Bah Isaac Basaiawmoit Secretary HYC, na ka jingïalam ki nongdih drok, ka seng ka la ïoh jingtip ba ki nongdih drok ki ju shong dih ha kawei ka jaka kaba don ha lyndet jong ka City Hut Dhaba, Shillong.
Katba dang pynlong ïa ka jingkhynra la lap ïa ki shi kurim kiba dang thiah sngi bad ha katei ka jaka ba ki thiah la lap ba don ki thyrnia injek drok, ki nep kup thiah bad bun kiwei ki tiar ki tar. Ka seng ka la phah ban lum ïa ki tyrnia injek drok ban ai jingsneng jingkyntu ïa ki ba ki dei ban kylla noh na ka jingim kaba ki im.
Shuh-shuh ka seng ka la tohkit bha ïa kine arngut bad ka kynthei ka la ïathuh ba ki ju pynlong ïa katei ka jaka tang ban shu thiah ha ka por mynsngi namar ba kim don ïa ka ïingsah. Kham hadien ka kynthei ka la ïathuh ba ynda la mynmiet ka ju leit ban kamai die met ha Khyndailad tang namar ban ïoh ban pynbiang bai dih drok ïalade bad la u jong u kurim.
U Bah Roykupar Synrem President HYC u la pynpaw ïa ka jingsngewkhia ba ka jaka ba hapdeng duh ka nongbah Shillong ka kylla long ka ktem jong ki jingsniew ba bunjait, kumba la lap ba ym dei tang ki nongdih drok kiba shong rieh tngen ha katei ka jaka, hynrei ka long ruh ka ktem jong ki kam die met, tang namar ba kin ïoh pynhun ïa ka jingdonkam ban ïoh thied drok.
U la buh jingkylli ïa ki trai jaka, ba kumno ki ailad ha ka jaka jong ki ban pynlong ka ktem ki kam awria bad kum ka jaka rieh tngen ki nongdie bad dih drok.
U la kren shai ruh ba ka seng kan ym shongthait ban ïakhun ïa ka thma pyrshah ïa u drok, “Ka HYC kan ym tieng ïa ki jingpynngat kyndon aiñ, ki jingkynnoh ba ngi leh ki kam be-aiñ, na ka bynta ban ïada, ban pynneh pynsah ïa ka jaidbynriew bad ban pynkhuid pynbha ïa ka ri Khasi” la ong u Bah Roykupar.
