Shillong, K’Lyngkot 21
Ki Nongïalam ka BJP ba la lamkhmat da u Bah Sanbor Shullai, Myntri ka Sorkar ha ka jingïakynduh ïa u Rajnath Singh, Myntri ïada ri, ki la phah tuklar ha u ban pynbeit noh kloi ïa ka kam ba sahteng ha ka ban pynkynriah ïa ki Dalit Sikh na Them Mawlong sha Cantonment Area.
U Bah Sanbor uba la mihkhmat kum u MLA jong ka thaiñ Shillong Cantonment, u la pynpaw ïa ka jinglong kynrum kynram bad kongsan kane ka kam, haba kyntu ïa ka Ministry ban shim noh kham kloi ïa ka rai kaba mynjur lang.
Ka kynhun kala kyrpad ruh ïa u Myntri ka Sorkar Pdeng ban pynthikna ha ka jingpyntreikam kloi ïa ka Building Bye-law bala mynjur dang shen da ka Cantonment Board bad ban pynsted noh ïa ka jingpynthymmai ïa ka policy hapoh ka Cantonment Area.
Nalor kane, ki nongïalam kila kyrpad ïa ka jingmynjur ba kham kloi na ka bynta ka jingaiti ïa ka jaka kaba donkam na ka bynta ban lah pyndep noh kloi ïa ka Shillong flyover project.
“U Myntri kam ïada ri u la sngap bha ïa ka kynhun bad kular ba ïa kine ki kam baroh bala pynsngew, un sa shong bishar bad un sa ïakren ruh bad ki bor ba dei khmih,” ong u Bah Sanbor.
U la pynpaw ba ka kynhun kan sa ïakynduh biang ïa u Myntri kam ïada ri ban buddien ïa kine ki kam bad ban pynthikna ïa ka jingpyntreikam kloi ïa ki.
