Shillong, K’Lyngkot 21
U nongïalam ka Hynñiewtrep Youth’s Council (HYC) u la shah khot hajir ha ki pulit ka Sadar Police Station halor ka jingkynnoh ba u donkti ban bom ban shoh ïa uwei u nongdih drok u ba la khlad noh ha u snem ba la dep.
Haba ïakren hadien ba u la mih na Sadar Police Station u Bah Isaac Basaiawmoit, Secretary HYC u la ïathuh ba ki pulit ki la pynpaw ba kam don kano-kano ka jingujor ejahar pyrshah ïa u, hynrei u la ong ba ka dei namar ka jingdon ki briew kiba bishni ïa ka seng, kiba la kynshoit sha ki longïing u ba la khlad bad pynmih ruh ïa ka kyrteng jong u.
U la ïathuh ba ka jingshah bom utei u nongdih drok ka dei kaba la jia ha MUDA ha ka 23 tarik u Naiwieng bad u ba la khlad ha ka 4 tarik u Nohprah 2025 hapoh Nazareth Hospital Shillong.
Shuh-shuh u la pynpaw ba um sngewlah ban pdiang ïa ka jingshah khot hajir, hynrei namar ka jingkhot jong ki pulit u wan ban pyndep ïa ka jingshah khot.
Haba bynrap ïa kane u Bah Rhembor G Saibon, General Secretary HYC u la pynpaw ba ka jingïap jong utei u nongdih drok lehse kam dei eh tang na ka daw ba shoh ba dat, hynrei u briew ba dih drok u don shibun ki jingpang jingshitom ha ka met bad ban shu kynnoh ïa ka seng ba ka donkti ka long kaba bakla bad ka jingïalam bakla.
“Kane ka dei ka jingpharep jong ki briew ïa ka seng namar ba ka seng ka la trei borbah bha ha ki snem kiba la dep ha ka ban ïakhun pyrshah ïa u drok, uba la pynjot ïa ki khun samla ka imlang ka sahlang,” la ong u Bah Rhembor.
U la pynpaw ba ka HYC kan ym shongthait haba ïadei ban ïakhun pyrshah ïa u drok bad buh ïa ka jingkular ba kin ym shongthait ne shong kli kti ban ïakhun pynduhjait ïa u drok.
