Shillong, K’Lyngkot 21
Ka Mawsyiem bad ka Shillong Sixers ki la jam sha ka final ha ka Third Division Cricket League 2026 ba la pynïaid da ka Shillong Cricket Association hadien ba ki la khur jingjop ha ka sngi Balang.
Ha ka jingïakhun semi final kaba la long ha madan Urkaliar, ka Mawsyiem ka la pynliem noh ïa ka Youngstar CC da 24 run. Ka Mawsyiem ka la kam trai ban tied nyngkong ha kaba ka la kamai 154 run bad shah pynhap 4 wiket ha ki 20 over. U Malcolm Syiemlieh u la khyrwit ïa ka shiteng spah kaba 51 run na ki 40 bol bad u Pynshngaiñ M Umlong u la ïoh 22 run na ki 15 bol. U Ricky u la khur 2 wiket bad ïa ka 1 wiket la ïoh da u Prateek Kumar Rajak.
Haba wan beh ïa ka thong, ka Youngstar ka la kamai tang 130 run bad shah pynhap 9 wiket ha ki 20 over. U Prateek Kumar Rajak u la tied 32 run na ki 23 bol bad u Suraj Chettri u la ïoh 26 run na ki 34 bol. Katba u Settle Diengdoh u la khur 4 wiket bad ïa ka 1 wiket la ïoh da u Devention Lyngdoh. Ïa ka nam Player of the Match la khur da u Settle Diengdoh.
Haba phai sha kawei pat ka jingïakhun semi final kaba ar, ka Shillong Sixers ka la jop da 128 run ïa ka Ages. Ka Shillong Sixers kaba la kam trai ban tied nyngkong, ka la kamai 232 run bad shah pynhap 6 wiket ha ki 20 over. U Amir Sheikh u la khyrwit ïa ka shiteng spah kaba 75 run na ki 31 bol bad u Gufran Ahmed u la ïoh 27 run na ki 11 bol. Katba u Kroney B Marak u la ïoh 2 wiket bad ïa ka 1 wiket la ïoh da u Bobier Sangma.
Haba wan beh ïa ka thong ki nongtied ka Ages ki la shah pynkhyllem lut baroh bad kamai tang 104 run ha ki 20 over. U Drabest Marak u la tied 38 run na ki 27 bol bad u Roger u la ïoh 21 run na ki 9 bol. Katba u Evert Mawlong bad u Sandeep Roy ki la khur mar 3 wiket. Ïa ka nam Player of the Match la khur da u Amir Sheikh.
