Shillong, K’Lyngkot 21
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi biang na ki jingjia shah prong tuh jong ki ïing ha kylleng.
Katkum ka khubor kaba la ïoh na ki pulit la ong ba na ka liang jong ka Kong Nolinda Nongkynrih ka la ai ka jingujor ba ha ka 19 tarik mynta u bnai, ha ka por kumba dang 3 baje mynstep, ki runar bym lah ban ithuh, ki la tuh ïa ki lai tylli ki jingdeng ksiar, ka pisa kaba long 6 hajar tyngka bad kawei ka mobile phone na ka ïing jong ka, kaba don ha Mawiong, Diengpasoh ha East Khasi Hills.
Ha kawei pat ka khubor, kawei ka longkmie ka la ai ka jingujor ba ha ka 20 tarik Nohprah, 2025 ha ka por kumba 4 baje janmiet, uwei u briew u la rung jubor hapoh ka ïing jong ka, kaba don ha Madanrting Block-F, Shillong bad ban tuh ïa kawei ka mobile phone, kawei ka Tablet bad ar tylli ki LPG cylinder.
Kumjuh ruh uwei u nongshong shnong jong ka dong ha Tura, West Garo Hills u la ai ka jingujor ba ha ka 18 tarik mynta u bnai, ha ka por kumba 9 baje mynmiet, uwei u briew u la tuh ïa ka mobile phone jong u, na ka ïingsah jong u bad kham hadien u la bret noh harud jong ka surok.
Ha kawei pat ka khubor ha ka 19 tarik mynta u bnai, la lap ïa kawei ka arshaka kaba don ïa u registration number AS18-L-1287 kaba la ieh harud surok ha 12 Mer, Mylliem, East Khasi Hills. Haba la pynlong ïa ka jingtohkit, la lap ba kane ka arshaka ka dei kaba la shah tuh na Riangdo, West Khasi Hills ha ka 16 tarik mynta u bnai.
