Shillong, K’Lyngkot 22
Ka kynhun jong ki nongtrei bank, ka United Forum of Bank Union ka la pynbna paidbah ba kan sa pynlong jingïakhih da kaba khang ïa ki bank ha ka 27 tarik u Kyllalyngkot 2026 ban pyrshah ïa ka Sorkar namar ka jingbym ai jingbit ban long trei 5 sngi ha ka shi taïew watla ki la dawa ïa kane la kumba 3 snem.
Haba kren sha ki lad pathai khubor u Bah Davis Lyngdoh State Secretary jong ka United Forum of Bank Union u la ong ïa kane ka jingkhang kan long salonsar ha baroh kawei ka ri India ba la khot da ki 8 lak ngut ki nongtrei bank ba kynthup ïa ki nongtrei bank Sorkar, kumjuh ki katto katne ki bank shimet bad katto katne ki bank nabar ri bad ki regional bank.
U Bah Davis u la ïathuh ba ka Indian Banks Association (IBA) ha u snem 2022 ka la mynjur ban ai shuti baroh 4 tylli ki sngi saitjaiñ, hynrei ka IBA ka hap ban pan jingbit na ka Sorkar India na ka bynta kane, katba haduh mynta ka Sorkar ka khlem ai kano-kano ka jingbit halor kane.
U la ong ba ha ka UFBU ki kynhun kiba ïa snohlang ki don hynriew tylli ki seng baheh kynthup ïa ka AIBEA, AIBOC, bad ka NCBE bad pynpaw ba kane ka mat ka dei kaba ki la ap la slem bha.
Ka jingdawa ka UFBU ka dei ban ïoh noh ïa ka jingmynjur na ka Sorkar ban pyntreikam ïa ka 5 sngi treikam ha ka taïew ha ki bank, kata ban pynlong ïa baroh ki sngi Saitjaiñ kum ki sngi shuti. Da kaba ki la rai ban trei tam 40 minit ha ki sngi long trei kata naduh ka sngi Nyngkong haduh ka sngi Thohdieng, khnang ba kan nym ktah ïa ka jingai jingshakri ïa u paidbah.
U Bah Davis u la bynrap da kaba ong ba kumba ka RBI, SIDBI ka NABARD ki long trei tang 5 sngi ha ka shi taïew, katba ma ki pat ki hap ban trei tam ar ne lai sngi ha ka shi bnai. Namar kata ka UFBU kan pynlong ïa kane ka jingkhang bank bad ka kyrpad ïa ki paidbah baroh ba kin pynbiang lypa lada ki donkam ban sei pisa bad kiwei ki jingdonkam hapoh ki bank.
