Shillong, K’Lyngkot 22
U Bah Metbah Lyngdoh uba dei u Myntri ka tnad Bording u la pynshai ba ka Sorkar ka la shimkhia mardor halor ka jingeh kaba mih na ka jingthud khah-khah ka bording ha Nongbah Shillong bad ha kiwei ki bynta jong ka Jylla.
Kane ka jingpynshai u Myntri ka wan hadien ba u MLA ka Shillong West Konstitwensi, u Bah Paul Lyngdoh u la phah ka jingujor halor ka jingthud ka jingshakri bording kaba la wanrah jingeh shibun ïa ki paidbah nongshong shnong baroh kawei.
U Bah Metbah u la kyntait ba ka don kano-kano ka jingpynlip bording kaba buh por lane ka ‘Load Shedding’ ha ka Jylla haduh mynta.
U la pynshai ruh ba ki daw ba kongsan ba pynlip ïa ka bording ki dei na ka jingthut jong ki Conductor, ka jingjulor ki Transformer, lane ki Wire. Ki jaka ba donkam ban shna biang kloi khnang ban ïada na ki jingmynsaw bad ban pynbiang biang ïa ka bording.
“Ka jingsam bording ka ïaid ryntih, hynrei lada don ka jingpynlip, ka dei namar ba ki nongtrei ki hap ban maramot ïa ki jingthut ba thymmai,” la ong u Myntri.
U Myntri u la pyntip ba ka tnad ka la phah hukum ïa ki Assistant Executive Engineer (AEE) bad ki Sub-Divisional Officer (SDO) ba ki dei ban ïatreilang bad ki nongïalam shnong.
Ka thong hi jong ka tnad ka long ban pyntip lypa sha ki shnong lada donkam ban pynlip bording namar ki kam maramot, bad ban don ka jingpynshai kaba biang khnang ba ki paidbah kin tip ïa ka daw ka jinglip bording.
Haba ïadei bad ka Distrik Ri-Bhoi, u Myntri u la kubur ba ka don ka jingeh ha kaba ïadei bad ka jingsam bording sha kane ka District bad kular ba ka tnad ka la kham pynkhlaiñ ïa ka jingsam bording ha katei ka thaiñ.
U la pynpaw ba ka Sorkar ka la buh thong ba hapoh u snem 2028, baroh ki kam pynkhlaiñ bording ha baroh kawei ka Jylla kin dei ban pyndep. Kane ka jingpynbiang bording ka ïaid lyngba ki skim bapher-bapher kynthup ïa ka RDSS bad ka AHHE, khnang ba ka jingshakri kan long kaba skhem.
