Shillong, K’Lyngkot 22
U MLA ka BJP uba dei ruh u nongïalam ka Meghalaya Bharatiya Janata Party (BJP), kumjuh ruh u Myntri ka Sorkar Jylla, u Bah Sanbor Shullai ha ka sngi Palei jong ka taïew u la kop ba ka BJP kan jop 8 haduh 10 tylli ki seat ha ka ilekshon MDC ha Garo Hills Autonomous District Council (GHADC).
Haba kren bad ki lad pathai khubor u Bah Sanbor u la ïathuh ba ka BJP ka la dep khot Application na ka bynta kito kiba kwah ban ïakhun ilekshon MDC na ka BJP.
U Bah Sanbor u la kyntu ïa ki paidbah jong ka Rilum Garo ban phai khmat ha ki kam ba bha ba ka Party BJP ka la leh lyngba ka jingïalam da u Myntri Rangbahduh ka ri u Narendra Modi uba wanrah shibun ki kam pynroi na ka bynta ka ri kynthup ha ka Jylla Meghalaya ruh kumjuh.
U la ong ba ha ki 10 snem ba shimti ka BJP ïa ka bor Synshar ha ka Sorkar Pdeng, ka ri India ka la sakhi shibun ki kam pynroi lada ïa nujor bad ki kam pynroi kiba la leh 50 snem mynshwa eh.
“Ha ka ilekshon MDC sha GHADC nga thikna ba ka BJP kan jop 8 haduh 10 tylli ki Seat ha ka ilekshon ban wan namar nga tip ba ki paidbah ki la sngewthuh ba dei tang ka BJP kaba lah ban wanrah shibun ki kam pynroi na ka bynta ki paidbah jong ka thaiñ” la ong u Bah Sanbor.
U la ïathuh ruh ba ïa ki kam haba ïadei bad ka ilekshon MDC sha GHADC la khmih hi da u President ka Meghalaya BJP hynrei kum u MLA un hiar sha ka thaiñ Garo Hills na ka bynta ban ïalap ilekshon na ka bynta ki kyrtong jong ka party.
