Shillong, K’Lyngkot 22
U Nongïalam ka BJP u Bah Sanbor Shullai uba dei ruh u Myntri Sorkar, u la kyntait ïa ki jingkynnoh ba ka seng jong u, ka dei kaba pyrshah Khristan lane kaba pyrshah ïa ka jingbam doh masi ha Meghalaya, da kaba ong ba kine ki dei tang ki jingsaphriang ïa ki khubor lamler bad dei ki jingpynbiej ilekshon jong ki seng ba ïaleh pyrshah.
Haba ïakren bad ki nongthoh khubor u Bah Sanbor u la ong ba kiwei ki seng kum ka Congress, ka VPP bad kiwei kin ïakhun pyrshah ïa ka seng da kaba kynnoh ba ka BJP ka dei kaba pyrshah ïa ki niam Khristan bad kiwei.
“Kiwei ki seng, la ka long ka Congress, ka VPP kin pynsngewthuh bakla da ka niam pyrshah ïa ka BJP ha ka por ilekshon,” la ong u Bah Sanbor.
Shuh-shuh u Bah Sanbor u la ong ba ha ki jingïalap ilekshon kin sa ïalap ba ka BJP ka dei ka seng ba pyrshah ïa ki Khristan, ka BJP kan sa khang ïa ki paidbah ka Jylla Meghalaya ban bam doh Masi bad kumta ter-ter.
“Wat ha ka konstitwensi jong nga ruh ha ka por ilekshon kine ki dei ki jingong jong ki, ba ki la ong ba mar sien jop u Bah Sanbor Shullai na ka BJP un sa khang khyrdep lut ïa ki ïingmane baroh, un sa khang ïa ki briew ban leit jingïaseng, un sa wanrah ïa ki nongtrei jong u bad kin sa leit sha kawei pa kawei ka ïing ban peit ha ki ‘fridge’ jong ki lada don doh Masi ne em bad ba kin pynshitom ïa ki-kine ki dei ki jingïalap jong ki ha ka por ilekshon,”. Haba ïadei bad kane u Bah Sanbor u la buh jingkylli……? ba hato kane kan jia tang ha ka konstitwensi jong u ne ha kiwei-kiwei ki jaka ha Jylla Meghalaya, hynrei u la ong ba ka shong ha ka rai jong u paidbah ban jied.
