Gandhinagar, K’lyngkot:
Ki pulit ka Gujarat ha ka sngi Balang ki la kem ïa 8 ngut ki briew kiba plie ïa ki 82 tylli ki Bank Account ha ka kyrteng jong ki kompeni thok ha kaba ïadei bad ka kam thok kaba la kot sha ka T.826 klur tyngka, la ïathuh ki pulit, ong ka tyllong khubor ba la ïohlum.
Kine kiba shah kynnoh hadien ba ki la plie ïa ki bank account thok ki la nang pynbiang ïa ki ban leh ïa ki kam thok lyngba ki Cyber.
Kane ka jingkem ka la long ha ka por ba la pynlong ïa ka jingtohkit ha kaba ïadei bad ka jingdo n jong ki kam thok lyngba ki Cyber ha kaba la donkti ban kamai thok palat ïa ka T. 826 klur, la ong ki heh pulit.
U Superintendent of Police u Rajdeepsinh Zala, haba pynshai halor kane ka jingjia, u la batai shai, ba “Hapoh ka jingpyntreikam ïa ka Operation Mule Hunt ha Gujarat, ka Cyber Centre of Excellence ka la kem ïa 8 ngut ki briew na Surat kiba la shah kynnoh ba ki donkti ha ki 1,229 tylli ki kam runar ha ka cyber ha kylleng ka ri India, ha kaba ki jingïohlum pisa ki la kot sha ka T. 826 klur,” kumba la ïathuh ka tyllong khubor.
Kumba la kynnoh, la ong ba baroh ki la don kumba 82 tylli ki bank account kiba la plie da kiba shah kynnoh ha ka kyrteng jong ki khyndai tylli ki kompeni thok ban buhrieh ïa ka jingshisha shaphang jong ki.
Kiba shah kynnoh kiba don mynta ha phatok hadien kata la kynnoh ba ki la ïasam ïa ki jingtip ba bniah jong ki bank account bad ki nongleh kam sniew ha ka cyber, kiba la thmu ïa ki nongshong shnong.
Ki heh pulit ki la pynpaw shuh shuh ba ki nongleh kam sniew ha ka cyber, ki la pyndonkam da ki SMS, WhatsApp, bad Telegram ban thaw ïa ki jingithuh thok bad thok ïa ki paidbah da kaba tyrwa ïa ki ïa ki jingthmu ban kamai pisa “kham bun”, kaba la pynkylla sha kitei ki bank account thok.
Kine ki briew kiba la shah kem ki dei kiba la tip kyrteng kum u Abdulrab Abdul Qadir Chambadiya, Faizan Hanif Jusani, Sheikh Mohammed Zuber Mehboob, Mohammad Noor Ahmad Merchant, Yasin Noor Ahmed Merchant, Sarfaraz Mohammed Rafiq Juneja, Sheikh Sajid Mayuddin,bad u Memon Abdul Razak Ahmed; kine baroh ki dei kiba na Surat.
Ki heh sorkar haba ki pyntip kham bniah shaphang katei ka jingtreikam, ki la ong ba kiba shah kynnoh ki ïoh ïa ka komishon na man kawei pa kawei ka account.
Nalor ba u pynpoi pisa lyngba kine ki account sha ki kynhun runar cyber, kiba shah kynnoh ki la sei ruh ïa ka pisa bad pynïaid lyngba ki lynti ba beaiñ.
Ha kawei pat ka jingjia, uwei u nongkhaïi uba 53 snem ka rta na Goregaon ha Mumbai u la duhnong T.9.71 lak hadien ba u la ngat ha ka jingshah thok ha ka cyber ba la pynïadei bad ka e-challan thok kaba la ïoh pdiang ha ka WhatsApp.
Katkum ka jingujor jong ki pulit, kane ka jingleh thok ka la paw pyrthei haba une u nongkhaïi u la peit ïa ka bank statement jong u bad u la ïohi ïa lai tylli ki jingpynlut pisa khlem jingbit na ka IMPS kaba la kot sha ka 9,71,380 tyngka. Ki debit ki kynthup ïa ki pisa kiba T.500, T.4.80 lak bad T.4.90 lak, baroh la pynlong khlem ka jingtip ne jingmynjur jong u.
