Shillong, K’Lyngkot 22
Ka Nongkseh Sports Social and Cultural Club ka la khur ïa ka nam lahduh ha ka 11th All India Chief Minister’s Gold Cup Inter -national Football Tourna-ment, hadien ba ka la lah ban pynliem noh ïa ka BSF (Jalandhar) da 1-0 kol ha ka jingïakhun final kaba la long ha ka sngi Palei ha Jorethang, South Sikkim.
Kane ka kynhun hapoh ka jingïalam u Bah Richard Nongneng ka la ïohpdiang ïa ka khusnam pisa kaba T. 20 lak tyngka ryngkat ka trophy.
Kane ka nam jop ka la wan urlong lyngba ka shi kol ba la thep da u Kynsaibor Lhuid uba la shut najngai ha ka minit kaba 51 jong ka kylla miet hakaba u rangapkol ka BSF um shym la lah ban khanglad na katei ka jingshah thep.
Te kumta u Kynsai u la ïohpdiang ïa ka nam Man of the Tournament ryngkat bad ka kali kaba dangthymmai ka Tata Tiago.
Haba phai sha kane ka jingïalehkai, ka Nongkseh ka la lah ban ïalehkai bha naduh kaba sdang ha kaba ka la ïoh ïa ki katto katne ki kabu kiba biang, hynrei ki rangïalehkai ka BSF ki la lah ban khanglad na ka jingshah thep.
Kumjuh ka BSF ka la ïoh tang shisien ban shut sha kol lyngba ka jinglah ban pyndei da ka khlieh na uwei na ki rangïalehkai, hynrei u rangapkol ka Nong -kseh u Daraphun Talang u la lah ban khanglad na ka jingshah thep.
Lah ban pynkynmaw ba ka Nongkseh ka la long ka kynhun kaba khlem shah rem ha katei ka lympung ha kaba ka la jop ïa ka Himalayan Gangtok kaba na Sikkim da 2 kol la kawei, hadien ba ka la jop da 1 kol la nod ïa ka Eastern Railway bad 4 kol la nod ïa ka NEROCA FC hashwa ba kan pynliem sa ka Red Panda FC da 1 kol la nod ha ka semi final.
Halor kane ka jingïaid lynti kaba khlem shah rem naduh u snem ba la lah bad kumjuh ha kane ka kynti kaba mynta, kane ka kynhun hapoh ka jingïa-lam u Bah Richard Nong-neng ka la shah khot sngewbha sa ha ka kynhun ïalehkai Indian Super League (ISL) ka North-East United FC na ka bynta ka jingïalehkai paralok ka ban long ha ka 8 tarik u Rymphang ha Indira Gandhi Athletic Stadium, Guwahati.
