Shimla, K’lyngkot:
U Myntri Rangbah jong ka Himachal Pradesh, u Sukhvinder Singh Sukhu, ha ka sngi Balang, u la ïoh ïa ka khubor shah byrngem pynïap hashwa ka Republic Day, da ka email, kaba maham ïa ka jingthombor da u riewkheiñduh ban pynbthei bom ha ka por ba kyntiew ïa ka lama, la ïathuh ki heh pulit.
Katkum ka jingïathuh ki pulit, ïa kane ka email byrngem la ïoh ha ka official email ID jong ka ophis u Deputy Commissioner ha Shimla. Ka mail ka la ong ba lada u Myntri Rangbah ka jylla un kyntiew ïa ka lama ka ri ha ka sngi rakhe ïa ka Republic Day, un shah thombor da ka jingpynbthei bom.
Haba pyntikna ïa kane ka jingjia, u Deputy Commissioner ka Shimla u Anupam Kashyap u la ong, “La ïoh ïa ka mail, bad ngi la phah ïa kajuh sha ki pulit ban leh ïa kaba donkam.”
Hadien katei ka jingujor, ki pulit ki la buh jingmudui pyrshah ïa u briew bym lah ban ithuh ha Sadar Police Station, Shimla, katkum ki kyndon aiñ kiba ïadei.
Ïa kane ka email byrngem la phah na ka ID kaba khlem pynpaw kyrteng, la ïathuh ki pulit.
Ki heh pulit ki la pynpaw ba la pynbor ïa ki riew shemphang ha ka cyber ban wad ïa ka tynrai bad ka jaka jong ka email da kaba pyndonkam ïa ki sakhi Electronic bad Digital.
“Ka jingpyrshang ka dang ïaid ban ithuh bad kem kloi ïa u nongphah,” la ong ki pulit bad bynrap ba la buh ïa ka jingpahara bad jingpeitngor kaba kham bniah namar ka jingma. Hynrei ki pulit ki la ong ba ka jingtohkit ba nyngkong ka pyni ba katei ka email ka lah ban dei kaba la phah ban wanrah ïa ka jingsyier bad jingtieng ïa ki paidbah da kaba pynsaphriang ïa ki jingtip kiba bakla bad kiba ïalam bakla.
U Superintendent jong ki pulit jong ka Shimla distrik u Sanjeev Kumar Gandhi u la ong ba kum kine ki email ki la ju ïoh ha ki por ba dang shen ruh kumjuh. Ki tnad pahara ki dang bteng ban buddien ïa ka jinglong jingman katba ka sngi Republic Day ka nang jan, la bynrap shuh shuh ki heh sorkar.
