Shillong, K’Lyngkot 22
Ar ngut kynthup u dkhot jong ka Hynñiewtrep National Liberation Council (HNLC) u Issei Sungoh, uba la ithuh kum u nongsuhbuit ha lyndet ka jingpynbthei bomb IED ha phyllaw ka Dhar Construction Company, kaba la jia ha ka 15 tarik Nohprah 2025, ha Shymplong, East Jaiñtia Hills, ki la shah kem noh ha ka sngi Palei.
Ïa kine ki arngut la ïoh kem da ki pulit ka East Jaiñtia Hills bad West Jaiñtia Hills ha ka jingkhynra kaba la pynlong lang ha katei ka sngi.
“U Issei Sungoh ba ju khot sin u Sei ne Bah (29 snem) na Mynso B, West Jaiñtia Hills bad Embha Ladong (25 snem) na Shymplong, East Jaiñtia Hills, kila shah kem ha ka jingkhynra bala pynlong lang da ki Pulit ka EJH bad WJH,” la ong u Superintendent of Police ka EJH Vikash Kumar ha ka kyrwoh ha ka sngi Palei.
“Ïa kine baroh arngut la rah ‘tian bishar hakhmat ka ïingbishar, kaba la ailad haduh hynriew sngi ban set ha along ki pulit (police custody) ban tohkit bniah halor katei ka kam, kaba la ïaid shaid shaid mynta,” u la bynrap.
U Issei Sungoh u dei uba la shah thwet jur ha ki Pulit namar ka jingdonkti ha ka jingpynbthei bom IED ha Police Reserve, Khliehriat bad kiwei kiwei ki kam be-aiñ.
Shuh shuh na ka liang jong u SP u la buh ruh ka jingkyrpad “Lada don kino kino ki briew kiba don jingtip shaphang kiwei pat ki runar ba donkti ha kane ka kam be-aiñ, la kyrpad ba kin pyntip mardor sha ki thanad ba marjan. Ïa ka kyrteng bad jaka jong ki yn sa buhrieh bad yn sa ai buskit ruh kumjuh”.
Ka HNLC kala kam ïa ka jingdonkti ha ka jingpynbthei bom IED, haba kynnoh ba kala pynlong sohpdung ïa ki nongkynti jong u Symbud Myntri Rangbah Bah Sniawbhalang Dhar namar ka jingkyntait ban siew ïa ka jingdawa pisa.
Shuwa kane, ki pulit kila kem ïa arngut kata u Richard Suchen (31 snem) bad u Pynshaitbor Syih (45 snem) na ka bynta ka jingdonkti jong ki ha ka jingpynbthei bom IED.
