New Delhi, K’lyngkot:
Ka Municipal Corporation of Delhi (MCD) ka lah ban mang da T.10 klur ha ka mang tyngka ban wan khamtam eh na ka bynta ban pynheh bad pynkhlaiñ ïa lai tylli ki jaka ri ksew ba la tyrwa, la ïathuh ki heh sorkar.
Ïa ka jingthmu ban mang ha ka mang tyngka jong u snem 2026-27 Budget Estimates (BE) yn pyndonkam na ka bynta ban pynbha ïa ki jingtei ha ki jaka ri ksew kiba dang wan, ki la ong.
“Da kaba buh ha ka jingmut ïa ka jingbun ki ksew ha ka nongbah, kan don ka jingdonkam ban pynbha ïa ki jaka ri ïa ki kiba dang wan bad ban mang pisa sha ki. Ïa kane ka pisa yn pyndonkam ha kata ka liang,” la ong ki heh sorkar.
Ka jingtrei ka dang ïaid mynta na ka bynta ka jaka ri ksew ha Dwarka, kaba ha kaba sdang kan don ka jinglah ban buh haduh 1500 tylli ki ksew kiba kham buh jingma, ki la bynrap.
Ka korporashon ka la pynbna ha u bnai Nohprah jong u snem ba la lah ba yn shna ïa ka jaka ri ksew ha Dwarka Sector 29 ha ka jaka kaba heh kumba 2.5 akar ban pynsah ïa ki ksew kiba kham dakaid bad buh jingma.
Ha kajuh ka por, ar tylli kiwei pat ki jaka ri ksew ha surok Bijwasan bad Bella, kiba don 14 bad 40 tylli ki jaka ri ksew, la tyrwa ruh ban ri ïa ki kulai ba kham bun bad ban pynbha ïa ka jinglah jong ki Animal Birth Control (ABC) Centre, ki la ong.
Ka korporashon ka la ong ba ki jaka ri ksew ba la tyrwa kin pynkhlaiñ ïa ka rukom sumar ïa ki ksew shang lymwir bad ban pynbha ïa ka jingshngaiñ jong ki paidbah.
U MCD Commissioner Ashwini Kumar u la ong ba ha ka 5 tarik, Nohprah jong u snem ba la lah, ki la don palat 54,000 tylli ki ksew shang lymwir kiba la shah pynduh khun hapdeng u bnai Ïaïong bad bnai Nailur 2025.
Ha ka taïew ba la dep, ka lad pathai khubor, ka la pyntip ba ka MCD ka la mang haduh T. 35 klur ha ka mang tyngka ban wan na ka bynta ban ai Microchip bad ban ai dawai ïa ki ksew shang lymwir ha ka nongbah jong ka ri.
