Washington, K’lyngkot:
U President jong ka US, u Donald Trump, sha shisien pat u la byrngem ban takraiñ shuh-shuh da ki khajna kiba kham heh ban ia kaba u la dep buh baroh shi katta bad u la byrngem ruh ba un kham pyneh palat ban ia kaba kiwei ki President bad ki nongialam barim ka US, ki la leh ha ki por ba la leit.
Ka jingweng noh mynta ka taiew ïa ka jingthmu ban pynngat ïa ki ri Europe halor ka Greenland ka dei ka nuksa ba khatduh kumno ba u Trump teng- teng u pyndonkam ïa ka atiar khajna khlem da siat ïa ka. Bad ka jingdon jong ki jingma kiba khlem urlong ka la nang jur lada ka long kumne kumba ka long mynta.
Haduh mynta u Trump um pat pyndep ïa ki kamram ba ratbah ba u la kular halor ki ri kum ka Mexico bad Canada, lane ïa ki mar ba kynthup ïa ki tiar pynmih bor ding. Kiba la khot ki “jingsiew ba ar” naka bynta ki ri kiba khaïi bad ki nongshun jong ka US.
U Trump, u ong ba ka jinglong ba la pynkhreh jong u, ban pyndonkam ia ki khajna, ka la iarap ia ka US, ban jop ia ki jingeh bad jingduhnong ha ka liang ka khaïi- pateng bad ban ioh ia ki marpoh khyndew kiba kongsan, bad ban pynbeit ne pyniasuk ia ki jingiakynad ha kylleng ka pyrthei. Ka dei ka buit jingiakren ha kaba wat ka jingbyrngem ruh ka lah ban thaw ia ka jingmyntoi. Hynrei ki don ki dak ba ki nongialeh pyrshah ki nang kham tip ia ki jingleh jong u – kaba lah ban pynlong ia ki ban kham duna ka jingtreikam.
Katto katne na ki jingkynran dien jong u Trump ki la wan hadien ba ki nongthmu jong u ki la byrngem ban pynshitom beiñ – khamtam eh ka China. U Trump u la pynkiew ia ka khajna haduh 3 sien kynthih, hynrei u la pynhiar biang ïa ki ha kaba bun na ka bynta hadien ba ka china ka la ong ba kan khanglad ïa ka jingshalan ïa ki marpoh khyndew kiba kongsan.
