Shillong, K’Lyngkot 23
Kawei ka samla Khasi kaba la buhrieh kyrteng ka la ngat ha ki briew kiba kular ai kam ban shet ha Delhi hynrei ynda ka la poi sha jaka ka la mad ïa ka jingeh ba kan hap die met ha kawei ka jaka ba la pynkhreh kyrpang.
Kane ka jingpaw pyrthei ka dei hadien ba ki nongïalam ka Khasi Students’ Union, Delhi Unit ki la ïoh ban leit pyllait ïa katei ka samla Khasi kaba ngat ha kane ka apot.
Haba buddien biang, la ïoh ban ïakren lyngba ka ‘phone’ bad ka President ka Khasi Students Union Delhi Unit, ka samla Marbiang Khongwir, kaba la ïathuh ba ka samla kynthei ka la shah shoh ha ki shynrang ha Delhi ka dei ba ka kyntait ban rung sha ka kam die met bad ka dei na thaiñ Ri-Bhoi bad myn ha ka 22 tarik mynta u bnai ki la leit buh ïa ka sha Kad Liengsuiñ Delhi ban phah wanphai noh sha la ïing.
Ka la ïathuh ba ka jingïoh pyllait ïa kane ka khynnah kynthei ka dei namarba ka la phone ïa ki nongïalam ka KSU Delhi Unit ban pan jingïarap na ki.
Ka la ïathuh ruh ba kane ka khynnah ka ïoh ban ‘phone’ sha ki dei namarba ka aidaw ïa u briew uba shoh ban phone halor ka pisa ban ai sha u bad haba ka la phone ïa ki namarba ka kren da ka Khasi uta u briew um sngewthuh ha kaba ka la ïohlad ban ïathuh ïa ka jaka ba ka don.
Ka samla Marbiang ka la kyntu ïa kiba ju wan wad kam ha Delhi ba kin da pyntip sha ka seng khnang ba kan suk ïa ki bad ïa ka seng ruh lada don kino-kino ki jingjia ba kum kine.
Ka la kyntu ruh ïa ki samla ba ki dei ban peit bha ïa ka jaka ba ki sah, ïa ka kyrteng jong ki trai bad ka la kyntu ruh ïa ki kmie ki kpa ban peit bha hashuwa ba kin phah ïa ki khun shabar.
Lah ban kdew hangne ba kane ka samla kynthei kaba shah shoh ha ki shynrang ha nongbah Delhi ka la jia ha ka miet ka 21 tarik mynta u bnai bad la ïoh ban pyllait na kti ki runar ha ka step 22 tarik mynta hi u bnai namarba ka kyntait ban rung sha ka kam die met hynrei u nongshah kynnoh pat u ai daw ba kane ka kynthei ka pan pisa na u bad ka kyntait ban pynphai noh ïa katei ka pisa na kata ka daw u sa leit ha ïingsah jong ka.
