Jowai, K’Lyngkot 23
Ka Meghalaya Basin Management Agency (MBMA), District Project Management Unit (DPMU), West Jaiñtia Hills bad ka State Project Management Unit (SPMU-CDP), Shillong ki la pynlong ka jingsam ïa ki kor rep bad ki kali kit mar-rep ne Agri Response Vehicles (ARVs) hapoh jong ka Horticulture Cluster Development Programme (CDP), WJHD.
Ïa kane ka prokram la pynlong ha ka 22 tarik Kyllalyngkot, 2026 ha Laskeiñ C&RD Block Hall, bad la bei pisa da ka National Horticulture Board (NHB) bad ka Planning Department ka Sorkar Meghalaya.
Ha ka jingkren kum u Kongsan, u Bah Comingone Ymbon, MLA ka 3-Raliang Constituency u la ban jur ba ka jingsam ïa kine ki kor rep bad ki kali kit mar kan pynsuk shibun ïa ka kam rep bad kan ïarap ruh ïa ki nongrep ban kyntiew ïa ka jingpynmih mar-rep bad ïa ka ïoh ka kot ka jong ki. U kyntu ruh ïa ki nongrep ba kin pyndonkam hok bad tyngkai bha ïa kine ki jingdon-jingem khnang ba kin lah ban shan slem.
Ha kane ka sngi la ïadon lang ruh u Bah F. Passah, MCS, Assistant Commissioner, WJH kum u Symbud Kongsan, u Dr. F. R. Shadap, Block Development Officer ka Laskeiñ C&RD Block, Kong Lucky Diengdoh, Joint Director Directorate of Horticulture, Bah D. Lyngdoh, Assistant Director Horticulture, WJH, Bah A.S. Suting, Deputy Project Director MBMA, Kong M. Syngkon, DPM, MBMA, WJH lem bad ki ophisar na ka tnad.
Baroh ki la don haduh 111 tylli ki kor rep bad 7 tylli ki kali kit mar-rep ba la sam sha ki nongïoh jingmyntoi da u Kongsan, Symbud Kongsan bad ki heh ophisar sha ki Community Based Organisations (CBOs) kiba hap hapoh ka Cluster.
Kine ki kor rep kin kyrshan ïa ki nongrep da kaba plie lad ban ïoh ban shim wai ïa ki ha ka dor kaba bit lyngba ki 12 tylli ki Custom Hiring Centers (CHCs) kiba la seng hapoh ka Cluster.
Kumjuh ruh kine ki 7 tylli ki kali kin ai ka jingshakri ha ka dor kaba bit ka ban pynlah ïa ki nongrep ba kin kit ïa ki mar rep jong ki sha ki jaka buh mar-rep, ki jaka pynkhreh mar bam, ki ïew ki hat bad sha kiwei pat ki jaka kiba ki kwah ban leit.
