Nongpoh, K’Lyngkot 23
Ka jingpynïeng ïa ki post ilektrik ha ka shnong Maikhuli ka la ïaid beit ïaid ryntih tad haduh ba la lah ban pyndep ban pynïeng ïa kumba 17 tylli ban pynbiang ïa ka bording ilektrik sha ki paidbah nongshong shnong khamtam kito ki longïing kiba mar syndah bad ka Jylla Assam.
Katkum ka tyllong khubor ba la ïoh lum, la ïathuh ba katei ka jingpynïeng ïa ki post ilektrik ka la sdang biang naduh ka 21 tarik, kata hadien shi sngi ba ka la mih ka huri-hura bad ruh ka jingïaktah kti mar-met hapdeng ki nongshong shnong ka Maikhuli bad ki briew na ka Jylla Assam.
La ïathuh ruh ba ki nongshong shnong ka Maikhuli ki la ïoh ban pynïeng bad pynskhem ïa kitei ki post ilektrik da ka dewbilat khlem da don shuh kano-kano ka jingpyrshah na ki briew ka Jylla Assam tad haduh ba la lah ban pyndep lut hynnin ka sngi, ka 22 tarik u bnai Kyllalyngkot bad la ïoh ban pynpoi ïa ka bording ilektrik sha baroh ki longïing ki bym pat ïoh lait.
La ïoh jingtip ruh ba ka jingpyndait ïa ki waïar lait ha kitei ki post ilektrik ba thymmai ha katei ka shnong Maikhuli ka ïasyriem thik kumba la leh da ka Jylla Assam ha ka shnong Ummat jong ka thaiñ Block 2, Ri-Bhoi District ha kaba ïa ki waïar la sop-spaiñ na uwei u post ilektrik sha uwei pat khnang ban khanglad ïa ki briew na ka jingtuh ïa ka bording.
Halor kane ka bynta, na ka liang ki nongshong shnong ka Maikhuli ki la ai ka jingïaroh sha u Myntri Rangbah ka Jylla, u Conrad K. Sangma lem bad u MLA ka thaiñ ba dei ruh u Myntri ka tnad C&RD ka Jylla, u Bah Sosthenes Sohtun, kiba la shimkhia halor kane ka kam haduh ba kan da ïaid beit ïaid ryntih kumba ka long mynta.
