Indore, K’lyngkot:
Ki la don kumba khyndai ngut ki briew kiba la kem pang hadien ba ki la dih ïa ka um dih kaba jakhlia bad kaba la kylla long bih ha ka thaiñ Mhow jong ka Indore distrik kaba don ha Madhya Pradesh, la ïathuh ki heh sorkar ha ka sngi Thohdieng.
La ïoh jingtip jong ka jingdon ka jingjaboh jong ka um ha ka thaiñ Patti Bazaar bad ka Chander Marg ha ka miet jong ka sngi Palei, ki la bynrap.
U Collector jong ka Indore u Shivam Verma u la poi ha Mhow ha ka por janmiet jong ka sngi Palei bad u la leit jngoh ïa ki nongpang kiba dang ïoh jingsumar ha kawei ka Hospital, ha kajuh ka por u la ïakren ruh bad ki nongshong shnong jong ki jaka ba la shah ktah, ong uwei u heh sorkar. Khyndai ngut ki nongpang ki la shah sumar ha hospital, katba katto katne ngut kiwei pat ki dang sumar hala ki jong ki ïing hadien ba ki la shah khmih bniah ha ki jaka sumar bad ïoh ïa ki dawai, u la bynrap.
Ki briew na ka tnad ka koit ka khiah ki la don ha katei ka jaka naduh ka step jong ka sngi Thohdieng hapoh ka jingbthah jong u Chief Medical and Health Officer (CMHO) u Dr Madhav Hasani.
Ka kynhun na Indore Medical College, ryngkat bad kiwei pat ki doktor kiba tbit, ki dang phah ruh sha ki jaka ba shah ktah.
Ka MLA jong ka Mhow ka Usha Thakur ka la leit sha kane ka hospital ban ïakynduh ïa ki briew kiba la shah ktah.
U Collector u la bthah ïa ka tnad ka koit ka khiah ban pynthikna ïa ka jingsumar kaba biang bad kaba paka ïa baroh ki nongpang bad bthah ruh ïa ka Mhow Cantonment Board ban peit bniah ïa ka jinglong ka um bad ban pynneh ïa ka jingkhuid jingsuba ha katei ka thaiñ.
La ïathuh ba ki don ki jingpang ba ïoh na ka um, ha ki jaka jong ka Patti Bazaar bad Chander Marg, ha ka miet jong ka sngi Palei, la bynrap shuh shuh ki heh sorkar.
‘Hato ka jingsiew ba i lutksan kan wanrah biang ïa u..’: U khunlung ba la kha hadien shiphew snem jong ka jingthrang ban ïoh khun ha ryngkat ki jingduwai bad mynta pat u la long u lanot na kane ka jingjaboh ha ka um ha Indore
“Ka sorkar ka dang buddien bha ïa kane ka jinglong jingman”, la ong u Verma. “Yn jurip ïa ki jaka ba shah ktah, bad ïa ki nongshong shnong kiba mad ïa kino kino ki dak jingpang yn ai jingsumar kaba biang, ha kaba ki nongpang kiba shitom bha kin shah sumar ha hospital.”
Ym don nongpang uba don ha ka jingeh kaba khraw mynta, bad kumba la khmih lynti kin sa don ki ban sa shah pyllait noh ha kine ki sngi, u la bynrap.
Ha u bnai ba la lah, la don katto katne ngut ki briew, kiba la kem pang, bad hynñiew ngut, kiba la ïap, ha kaba ïadei bad ka jingjia jong ka jingjaboh ka um, ha ka thaiñ Bhagirathpura jong ka Indore.
Katba ki nongshong shnong jong ka thaiñ ki kam ba kane ka jingpang ka la shim ïa 25 tylli ki mynsiem briew, ka jingbuh jingtip kumba la ai da ka sorkar Madhya Pradesh sha ka High Court ha ka 15 tarik Kyllalyngkot kaba la kdew ba ki la don kumba hynñiew ngut kiba la ïap, kynthup ïa u khyllung ba dang san bnai.
