Shillong, K’Lyngkot 23
Ka phlim Khasi, ‘Ha Lyngkha Bneng’ (The Elysian Field) jong u Bah Pradip Kurbah ka la thaw ïa ka histori ha ka tamasa phlim ba 24 jong ka ‘Pune International Film Festival’ (PIFF) ha kaba ka dei tang ma ka, ka phlim ba na India ban don ha ka jingïakop phlim jong ka pyrthei bad ban ïoh rah syndon ïa ka burom kaba ha khlieh duh ha ka histori jong ka tamasa kaba la duh mynta la 24 snem.
Kane ka phlim ‘The Elysian Field’ (Ha Lyngkha Bneng), kaba la direk da u Director ba pawnam ka ri India, Bah Pradip Kurbah, ka la jop ïa ka khusnam jong ka Sorkar Maharashtra ‘Sant Tukaram’ kum ka ‘Best Film’ ha ka pyrthei ha ka tamasa phlim kaba 24 jong ka Pune International Film Festival (PIFF).
Lah ban kdew ba kane ka phlim ka dei tang ma ka – ka phlim jong ka ri India kaba la shah jied na ka bynta ka jingïakop phlim ha ka pyrthei ha kaba la don palat 900 tylli ki phlim na ki 103 tylli ki ri, ha kaba la jied tang 14 tylli ki phlim sha ka wat kaba khatduh da ka kynhun bishar jong ka pyrthei bad dei ha kane ka wat kaba khatduh, ki nongbishar ki lah jied syndon ïa kane ka phlim Khasi ban ïoh ïa ka khusnam ‘Best Film’ ha ka Pyrthei.
Ka jingjop jong ka phlim ‘Ha Lyngkha Bneng’ (The Elysian Field) ka pynlong ïa ka kum ka phlim India kaba nyngkong eh ban ïoh ïa ka khusnam ‘Sant Tukaram’ ha ka pyrthei ha ka bynta jong ka jingïakop pyrthei naduh ba la sdang ïa kane ka tamasa ha u snem 2002.
