Chennai, K’lyngkot:
Khyndiat kynta shwa ba u Myntri Rangbahduh ka ri u Narendra Modi un sdang ïa ka jingïalang paidbah jong ka NDA ha Tamil Nadu, u Myntri Rangbah ka jylla u MK Stalin u la rah ïa ka rai kaba tyngeh bha hapoh ka Ïingdorbar Thawaiñ ka jylla ban pyrshah ïa ka prokram ai kam ai jam ha nongkyndong kaba la pynkylla kyrteng thymmai da ka sorkar pdeng, ka Viksit Bharat – Guarantee for Rozgar and Ajeevika Mission (Gramin) (VB-G RAM-G).
Ka Resolution ka khot ban pynphai biang ïa ka rukom treikam jong ka Mahatma Gandhi National Rural Employment Guarantee Act (MGNREGA), da kaba maham ba ki jingpynkylla ba la tyrwa ki lah ban pyntlot ïa ka jingim nongkyndong, ban pynduhjait ïa ki nongrim jong ka sorkar pdeng, bad ban buh ïa ka jingkit kaba khia ha ka liang ka pisa tyngka ha ki jylla.
Haba wanrah ïa ka rai, u Stalin u la kynthoh ba ka jingleh jong ka sorkar pdeng ban bujli ïa ka rukom treikam jong ka MGNREGA ka long kum ka jingpynsniew ïa ka prokram ai jingïada ïa ka imlang sahlang kaba pawnam.
“Ïa ka Hok Treikam jong ki Nongkyndong dei ban ïada kumba la pynskhem hapoh ka Mahatma Gandhi National Rural Employment Guarantee Act,” la ong ka Resolution, kaba kyntu ïa ka sorkar pdeng ban pynthikna ïa ka jingbei tyngka kaba ïai bteng katkum ka jingdawa kam bad ka jingtreikam jong ka jylla.
