Shillong, K’Lyngkot 23
Ka Sorkar Jylla ha ka sngi Thohdieng ka la kyntu ïa u Pro Vice Chancellor ka Skulbah NEHU, u Prof. S Umdor ban wan phai biang sha ka kam khnang ban ïaid beit ïaid ryntih ki kam hapoh ka Skulbah.
Lah ban kdew ba ha ka 15 tarik u Nohprah 2025, u Pro Vice Chancellor ka Skulbah NEHU u Prof. S Umdor u la aiti ïa ka shithi iehnoh kam kum u Pro VC ka Skulbah.
Haba kren sha ki lad pathai khubor u Myntri ka tnad pule puthi ka Sorkar u Bah Lahkmen Rymbui, u la ong ba ka jingbym don nongïalam hapoh ka Skulbah NEHU ka la ktah ym tang ïa ka NEHU hynrei ïa palat 70 tylli ki kolej kiba ïasoh bad kane ka Skulbah.
U Bah Lahkmen u la ïathuh ba kane ka la ktah ïa ki kam hapoh ka Skulbah NEHU khamtam haba ïadei bad ki kam ban pynïaid ïa ki eksamin, ka thungkam thungjam bad ka jingmang pisa ban pyntrei ïa ki kam bad ban siew tulop ïa ki nongtrei jong ka Skulbah.
“Nga kyntu ïa u Prof. S Umdor ban wan phai biang sha ka kam bad ban shimti biang kum u Pro VC ka NEHU namar haduh mynta ka Skulbah kam pat pdiang ïa ka shithi iehnoh kam jong u. Ka jingwanphai biang u Prof. S Umdor kan pynthikna ba ki kam ki ïaid beit ïaid ryntih hapoh ka Skulbah” la ong u Bah Lahkmen.
U Myntri u la ïathuh ruh ba na ka liang ka Sorkar Meghalaya ha ka jingïalam u Myntri Rangbah ka Jylla ka la shim ki sienjam ban ïakren bad ka Tnad Pule Puthi ka Sorkar Pdeng ban pynbeit noh ïa ki jingeh ba ka NEHU ka ïakynduh haduh kine ki por.
U la ïathuh ba kum u Myntri ka Tnad Pule Puthi, u la dep ban ïakren bad baroh ki kynhun hapoh ka NEHU kumjuh ruh bad ka Sorkar Pdeng. “Hynrei namar ïa ka shithi iehnoh kam u Prof. S Umdor kum u Pro VC ka NEHU ym pat pdiang, nga kyntu ïa u ban wanphai biang sha ka kam khnang ban ïaid beit ïaid ryntih ki kam hapoh ka NEHU” u la ong.
Katba ngi dang ap ïa ka rai jong ka Ministry of Education ka Sorkar Pdeng, kan bha shibun ïa u Prof. S Umdor ban wan phai biang sha ka kam kum u Pro VC na ka bynta ka bha ka miat jong ka NEHU bad ki samla pule” la bynrap u Bah Lahkmen.
