Shillong, K’Lyngkot 23
Ka ïew jong ki nongshong die madan ha MUDA kiba la shah pynkynriah na lynti ïaid kjat ha Khyndailad ka la kynjah bha bha mynta mar syn mih u snem ba thymmai namar ba duna bha ki paidbah nongwan ïew wan hat.
Katkum ka jingïathuh kiba shong die jingdie ha ka tei ka jaka ki ong ba ka shu shongshit tang shipor ha ka taïew shwa ka Khristmas bad New Year hynrei mynta ka la sdang biang ban kynjah kumba long ha ki sngi ba la dep.
Ki nongshong die jingdie ki la ïathuh ba ha u bnai Naiwieng bad ha u Nohprah ka ïew ka kham biang hynrei mar syn poi u snem thymmai mynta ka la sdang hiar biang.
Kane ka jinghiar bha ka ïew bad duna bha kiba wan sha ka tei ka ïew ha MUDA, ka dei lehse namar ki paidbah ki la thait ban wan khnang ban rung ha ka tei ka ïew ban thied jingthied ” la ïathuh kiba die jingdie ha ka tei ka ïew.
Shuh shuh ki la ïathuh ba ha ki snem ba la leit mynba ki dang shong ha lynti ïaid kjat ha Khyndailad ha u bnai ba nyngkong bad ba ar jong u snem ki dang bun bha ki paidbah bad ka long kaba shngaiñ ka ïew ka hat bad ki dang lah ban die ïa ki jingdie hynrei mynta ka la pher ym kumba long mynshwa.
Ki la ong ba ka dang lah shibun ban shong ha lynti ïaid kjat wat lada hap shah ïa u slap ka lyer namar ba ki dang lah bha ban die hynrei naduh ba pynkynriah hapoh jaka ïeng kali ha MUDA kim lah die wat tang 300 ruh shisngi bad don ka por wat tang ka bhoni ruh ym ïoh.
