Shillong, K’lyngkot 23
Ki bor distrik ka West Garo Hills ha ka Sngi Thohdieng ki la pynjari da ki kyndon aiñ ha ki 33 tylli ki shnong kiba hap hapoh ka jingpeit jong ki thanad Hallidayganj, Rajabala, Phulbari, bad Tura khnang ban khanglad ïa kino-kino ki jingjia kiba lah ban mih bad ban pynneh-pynsah ïa ka shongsuk shong shngaiñ ha katei ka thaiñ, hadien ka jingshah thombor ba dang shen jong ki dkhot kynhun seng ha Goalgoan.
Ka hukum katkum ka Section 163 jong ka Bharatiya Nagarik Suraksha Sanhita (BNSS) ba la pynmih da u District Magistrate, u Vibhor Aggarwal ka khang pyrshah ïa ki jingïaid proseshon ba khlem ïoh jingbit ne jingïalum be-aiñ jong 5 ne palat ngut ki briew bad ka jingrah ïa ki tiar ïaleh ne kino-kino ki tiar kiba lah ban pyndonkam kum ki tiar ïaleh, kynthup ïa ki dieng, nar-rot, bad ki maw ha ki jaka kiba lah ban don jingma naduh ka por 6 baje janmiet haduh 6 baje mynstep.
Ka hukum ka la maham ba kano-kano ka jingpynkheiñ kyndon kan khring ïa ki kyndon pynshitom katkum ka Section 223 jong ka BNS bad kiwei-kiwei ki kyndon kiba ïadei.
Ki 33 tylli ki shnong kiba la ithuh kum ki jaka ba don jingma ki kynthup ïa ka Hallidayganj, Jeldupara, Shyamding, Kasharipara, Boldamgre, Chibinang, Charkasaripara, Guaragre, Kokaimari, Lalmati, Nawalgre, Batabari, Konarchar, Gansenggre, Mengkakgre, Masangpani, Chandigre, Kharigaon, Sobribari, Gudibala (Katmil), Rongkhon, Panbari, Gomaijhora, Takimagre, Tetultulia, Demdema, Old Bhaitbari, Borojhora, Belbari, Rajpur, Jewali, Babilgre, Babulgre, Bollonggre, Songjalgre, Bamundanga, Chokchokia.
Ka hukum ka la pynpaw ba kane ka jingjia kaba dang shen ka la pynmih ïa ka jingkhuslai jingmut haba ïadei bad ka jingïakynad jaidbynriew bad kaba lah ban pynthut ïa ka shongsuk shongsaiñ hapdeng ki kynhun jaidbynriew bapher-bapher hapoh ka distrik.
“…katkum ka kaiphod jong ki pulit, ki la don katto-katne ki jingjia jong ki jingïakynad kiba la mih ha ki jaka ba don ki nongshong shnong ba ïakhleh lang ha ka jaka thor jong ka West Garo Hills namar ka jingsngewthuh bakla kaba ïalam pat sha ka jingbym shaniah hapdeng ki jaidbynriew bad ka jingmih jong ka jingsheptieng hapdeng ki briew kiba shong ba sah ha kito ki jaka,” ka la ong da kaba ban jur halor ka jingdonkam ban wanrah ïa ki lad jingïada kiba biang ban khang lad ïa kino-kino ki jingjia hapoh ka thaiñ.
