Shillong, K’Lyngkot 23
Ka National People’s Party lyngba u National Working President u James K Sangma ha ka 22 tarik u Kyllalyngkot 2026, ka la phah jingthoh sha u Myntri Rangbah ka Odisha u Mohan Charan Majhi ban phah kem mardor ïa ki briew kiba donkti ban thombor ïa u Pastor Bipin Bihari Naik da kaba phah bam da ka sboh eit masi kaba la jia ha ka 04 tarik u Kyllalyngkot.
Ha ka shithi ba la phah sha u Mohan Charan Majhi ka seng ka la pynpaw ïa ka jingsngewkhia halor kane ka jingjia kaba ktah ïa ka jingsngew jong kiba bun.
Ka seng ka la pynpaw ruh ba ka ri India ka ïeng ha ka nongrim lyngba ki kyndon jong ka riti synshar ha kaba ka jingngeit jong u wei pa u wei ka long laitluid lyngba ki aiñ kiba la buh.
“Ka jingjia kaba kum kine ha ka Jylla kaba shongsuk kum ka Odisha ka long kaba pynsngewsih shibun ïa ki nongshong shnong jong ka ri bad khamtam eh ïa ki riewngeit Khristan kiba ngeit ban im ka jingim kaba niew burom markylliang bad kaba burom ïalade” la ong ka seng.
Ka la kdew ruh ba ka jingthombor da ki paidbah kan ym lah ban bujli ïa ki kyndon jong ka aiñ da kaba thombor ïa u briew tang namar ka jingngeit namar ka jingngeit kadei kaba donkam ha ka hukum jong ka riti synshar. “Hynrei ka jingshisha halor kane ka jingjia kam artatien ba dei ban peitbniah da ki bor ba halor, namar kane ka rukom leh ïa u Pastor Bipin ka long ka kaba dei hok ban peitbniah. Kane ka rukom leh kam dei ban bujli ïa ka rukom treikam kaba dei namar kin wanrah ïa ka jingtieng bad ka jingbym shaniah hapdeng ki nongshong shnong” la pynpaw u James ha ka jingthoh.
