Hyderabad, K’lyngkot:
Ki Pulit jong ka Telangana, ki la buh ïa ka jingmudui mukotduma pyrshah ïa ka kynhun synshar jong ka Gram Panchayat jong ka shnong Yacharam kaba don ha Rangareddy distrik, da kaba kynnoh ba ki bor pynïaid jong ka shnong ki donkti ha kaba la kynnoh ba ki la pynïap ïa kumba 100 tylli ki ksew ba lait pathar.
Ïa ka mukotduma la ujor hadien ba ka la don ka jingmudui da ka Stray Animal Foundation, kaba la pynpaw ïa ka kyrteng jong u Sarpanch, ki dkhot jong ka Ward bad u Panchayat Secretary
La sdang ïa ka jingtohkit halor kane ka kam. Ka jingtohkit kaba kham bniah ka dang ïaid shakhmat ban pynthikna ïa ki jingshisha kiba don sha lyndet jong ki jingkynnoh.
Ïa kane ka mukotduma la mudui hadien ba la ujor da ki dkhot jong ka Stay Animal Foundation.
Da kaba pynshong nongrim ha kane ka jingujor, ki pulit ki la buh jingthoh ïa u Sarpanch ka shnong, ki dkhot jong ka ward, bad ïa u Secretary ka Panchayat.
Ha kaba sdang jong une u bnai, ha kaba kum kane ka kam, la ujor ejahar da ki pulit ka Shayampet Police Station pyrshah ïa ki khyndai ngut ki briew, ba kynthup ïa u Sarpanch jong ka Shayampet, halor ka jingkynnoh ba ki la pynïap ïa ki 300 tylli ki ksew ba lait pathar ha ki shnong Shayampet bad Arepally.
Ki pulit ki la buh jingthoh ïa ka mukotduma katkum ka kyndon 11(1)(a)(l) jong ka Prevention of Cruelty to Animals Act 1960, katkum ka Law and BNS 325 (Mischief by killing or maiming an animal).
U P Ranjith Rao, Circle Inspector (CI), Shayampet Police Station, u la ïathuh ha ka lad pathai khubor kumne, “Ha ka 9 tarik u Kyllalyngkot, ngi la ïoh ïa ka dorkhas na u Adulapuram Gautam, uba dei u Prevention Officer ha ka ‘Stray Animal Foundation of India’.
Ha ka jingmudui jong u, u la ong ba kila jan don 300 tylli ki ksew kiba la shah pynïap ha ryngkat ka jingïatreilang jong u Sarpanch, u Vice-Sarpanch bad da ka jingïarap jong ki Secretary jong ka Panchayat bad arngut kiwei pat.
Da kaba pynshong nongrim ha ka jingujor, ngi la mudui ïa ka mukotduma katkum ka 325 BNS bad ka kyndon 11 jong ka Cruelty Prevention of Animal Act.”
Katkum ka ejahar, la kynnoh ba ki nongtrei jong ka Shayampet Sarpanch ki la shim wai ïa arngut ki briew ban pynïap ïa ki ksew da kaba pyndonkam da ka injek bih.
U Circle Inspector ha ka jingtohkit ïa baroh ar tylli ki shnong u la kam ba jan 1/10 na ki ksew ki la shah pynïap.
Ka jingtohkit ha kaba ïadei bad ka jingjia ka dang ïai bteng halor kane ka jingjia.
Ka jingbuddien ka dang bteng ban lap ïa ki jingshisha baroh halor kane ka jingdonkti ban pynïap ïa ki ksew.
Na ka bynta ban leh ïa ka post-mortem ïa ki metïap jong ki ksew la phah sha ka RFSL (Regional Forensic Science Laboratory).
U la ïathuh ruh ba ha ka jingtohkit bun ki nongshong shnong ki la ïathuh ba ki la shah pyndik bad shah dait kulmar ha ki ksew shang surok bad don ruh kiba ngat ha ki jingpang sniehdoh.
