Imphal K’lyngkot:
Ka kynhun Anti-Extortion Unit jong ki pulit ka Manipur, ha ryngkat ka jingïatreilang bad ki bor pahara jong ka sorkar pdeng, ka la ïakhun pyrshah ïa ki kynhun lehnoh ha ki thaiñ khappud jong ka Manipur da kaba kem ïa arngut kiba shah suba ba ki donkti ha ki kam dawa pisa.
Kane ka jingshah kem jong ki ka long hadien ka jingmih khubor ba dang shen halor ka jingdawa pisa kaba la thmu ïa ka kynhun Rajasthan School Games Wushu ha Kangpokpi.
Katkum ka khubor na ki pulit la ong ba kane ka jinglap ïa kane ka la wan ha ka jingkhynra lang ha ka sngi Palei hapoh bad sawdong ka Motbung Bazaar kaba hap hapoh jong ka Gamnom Saparmeina Police Station kaba don ha Kangpokpi distrik.
La ngeit ba kine ki briew ki don jingïadei bad kawei ka kynhun kaba la shah tohkit ha ki kam runar.
Da kaba pyntreikam katkum ki jingtip ba la ïoh na ki nongsyntiat, ki kynhun ba ïatreilang ki la pynlong ïa ka jingkhynra kaba ïatreilang ha ka por mynstep, kaba la pynlong ïa ka jingïoh kem ïa u Kaikhochon Kipgen (29) na ka shnong Saparmeina, jong ka Kangpokpi distrik, bad ïa u Kaisei Khongsai (22) jong ka Karbi Anglong, Assam, ïa uba la tip ba u la ïoh jaka sah ha ka shnong Jangnom kaba don ha Kangpokpi distrik.
Ka jingtreikam ka la ai ruh ïa ki sakhi kiba kongsan, kynthup ïa ar tylli ki mobile phone ba la suba ba ki don ïa ki jingpynshisha Digital jong ka jingtreikam jong ka kynhun dawa pisa bad ka Receipt book ba ïadei bad ki kam dawa pisa.
Ïa ki briew kiba la shah kem la aiti sha ki pulit ba dei peit ban tohkit bniah bad ban pynngat ha ki kyndon aiñ katkum ki aiñ kiba treikam.
Hashwa kane, ka jingjia, ka jingleit kerkut, ka jingkhynra bad ka jingleit thwet, ka la ïarap ban ïohkem ïa saw ngut ki dkhot ka kynhun lehnoh kiba la donkti ha ki kam dawa pisa bad ha kiwei pat ki kam pyntriem kiba ju jia ha baroh kawei ka jylla Manipur, la ïathuh ki heh ka kynhun pahara ha ka sngi Balang.
Napdeng kiba la shah kem u dei u Senjam Premjit Singh (38 uba dei u dkhot jong ka kynhun Kangleipak Communist Party (Taibanganba), uba la shah kem na Langthabal Khunou Mamang Leikai kaba don ha Thoubal distrik. Ki bor pahara ki la ïoh kurup ïa kawei ka mobile phone bad kawei ka card Aadhaar na kti jong u.
Ha kane kajuh ka sngi, kawei ka dkhot jong ka kynhun National Revolutionary Front of Manipur kaba la tip kyrteng kum ka Chingakham (Ningol) Ningthoujam (O) ka Rebika Devi (43) ka la shah kem na ka jaka sah ba ka sah mynta kaba don ha New Lambulane Lane-III kaba hap hapoh ka jingkhmih jong ka thanad Porompat ha Imphal East district. Kane ka briew ka dei shnong trai na Churachandpur distrik. Ha kane ka jingkhynra la ïoh ban kurup ïa kawei ka mobile phone.
Kawei pat ka dkhot jong ka kynhun lehnoh kaba la tip kyrteng kum ka Nongthombam Abesana Devi ba la tip ruh da ka kyrteng kum ka Machan (21) kaba don jingïadei bad ka Kangleipak Communist Party (MFL) ka la shah kem na ka ïingsah jong ka kaba don ha Huikap Makha Leikai kaba hap hapoh ka jingkhmih jong ki pulit ka Andro Police Station, Imphal East district. La ïoh kurup ïa kawei ka mobile phone na ka.
Ki bor pahara ki la ïoh ruh ban kem ïa u Bungcha Thoudam ba la tip ruh da ka kyrteng kum u Khamba (30) uba dei u dkhot ba trei shitom jong ka People’s Liberation Army (Manipur) Revolutionary People’s Front, na Singjamei Makha Khongnang Pheidekpi kaba don ha Imphal West district. La kurup ïa kawei ka mobile phone na ka ïingsah jong u.
