Nongstoiñ, K’Lyngkot 23
Katba ki sngi ki bnai bad ki snem ki la nang jam na kawei ka por sha kawei pat, ka khaïi-pateng, ka kamai-kajih, ka bylla sngi ruh, pynban ka la nang hiar arsut bad ka la long ka jinghiran ha ka ïoh ka kot khamtam ha ki longïing kiba duk bad kiba im sngi ban bylla tang ban ïoh ban pyndap ha ki ïing ki sem.
Ïa kane ka bynta, la pynpaw ruh wat da ki katto-katne ki nongshong die sohphlang harud jong ka surok Nongstoiñ-Shillong ha kawei na ki jaka kaba dang hap hapoh ka shnong Mawroh jong ka thaiñ Markasa, Eastern West Khasi Hills haba kren bad u nongthoh khubor.
Kawei na ki longkmie kaba shong die sohplang harud jong katei ka surok ha katei ka jaka kala ong ba wat ka kam ban shong die sohphlang mynta ka la ïapher haba ïa nujor bad ki snem ba la dep, ha kaba mynshuwa ha ka shi sngi ki dang ïoh ban die 5 kilo kumta ter-ter hynrei ha kine ki sngi ka long 2 haduh 3 kilo eh.
Haba pyrshang ban kylli kaei ka jingïohi bad jinglap jong ki halor kane ka jingïapher haba ki shong die sohphlang ha ki snem ba la lah bad ha ki sngi ba mynta, na ka liang jong ki, ki la pynpaw ba ha ki snem ba la dep, kiba bun ki paidbah nongleit nongwan haba ki ïaid na katei ka surok ki ju ïeng ban thied ïa u sohphlang hynrei ha kine ki sngi, ki nongleit-nongwan ki la duna bha ban ïeng ban thied ïa u sohphlang.
Shuh shuh ki la ong ba katkum ka jingpyrkhat jong ki, ka long ba ka jingduna jong ki nongleit nongwan kiba ïeng ban thied ïa u sohphlang lehse ka dei namar ba ma ki ruh ki mad ïa ki jingeh ha ka kamai-kajih ha ka bylla sngi kumba ma ki, ki mad haba ki shong ha i dukan barit harud surok ban die sohphlang.
Katei ka longkmie ka la ïawer ruh ïa ki nongïaid nongïeng lyngba katei ka surok ba lada ki sngewlah kin ïa ïeng lem ban ïathied ïa u sohphlang hynrei lada kim lah ruh na ka liang jong ki nongdie sohphlang kin ym sngew eiei.
