Shillong, K’Lyngkot 23
Ka Meghalaya Board of School Education (MBoSE) ka la thung ïa ka Academic Committee na ka bynta lai snem kaba long kum ka sienjam ban pynkhlaiñ ïa ki jingthmu ha ka pule dangle, ka jingkhmih bniah ïa ki rukom hikai bad ki rai ba ïadei bad ka jingpynlong ïa ki eksam hapoh ka Jylla.
Ka jingpynbna ba la pynmih na ka MBoSE Headquarter Tura, ka kdew ba ïa ka Committee la thung hapoh ka kyndon 21(1) jong ka Meghalaya Board of School Education (Amendment) Act, 2006.
U Executive Chairman ka MBoSE un bat kum u Chairman ka Academic Committee, katba ki heh Ophisar na ka tnad Pule Puthi ba kynthup ki Director ka Higher & Technical Education, School Education & Literacy bad ka Educational Research & Training, ki la shah kynthup kum ki dkhot.
Ka Committee ka wanrah lang ruh ïa ki stad pule puthi bad ki khlieh pynïaid jong ki jaka pule na kylleng ka Meghalaya kynthup ki nongmihkhmat ka NEHU, NERIE, ki College Sorkar, ki jaka pule ki Nonghikai bad ki Higher Secondary School ha Tura, Shillong, Jowai, Dalu bad Nongpoh.
U Controller of Examinations, MBOSE Tura, ruh u dei uwei na ki dkhot, katba u Chief Academic Officer ka MBOSE ula shah thung kum u Member Secretary.
Katkum ka jingpynbna, kine ki dkhot ba la jied kin bat ïa ka kam na ka bynta lai snem naduh ba pynmih ïa ka jingpynbna. Ka Board ka la ai ruh ïa katto katne ki bor bad jingtreikam jong ka Committee hapoh ka kyndon 23 (2)(XII) jong ka MBOSE Act, 1973, kum ka jingpynkhlaiñ ia ka bynta jong ka ha ka jingshna polisi bad wanrah ïa ka ‘School Education Standards’ ha baroh kawei ka Jylla.
