New Delhi, K’lyngkot:
Kum shi bynta jong ka jingpynkhreh ïa ka jingïada na ka bynta ka sngi Republic Day, katto katne phew ngut ki pulit ka Delhi kiba don ha ka kam ha madan kin deng ïa ki ïitkhmat AI kiba kham khlaiñbor ha kaba kin lah da kaba suk ban ithuh ïoh ba don kino kino ki briew kiba ishan khmat bad kiba don jingartatien ha kum kano ka por jingrakhe ha ki jaka ba ïalum paidbah ne bun briew ha ka nongbah.
Ïa kine ki ïitkhmat ba khlaiñ ba la shna da kawei ka kompeni na India, yn pyndonkam ha kum kine ki por bad ka jingtip jong ki pulit ïa ki nongleh kam sniew, ki nongleh kam sniew kiba la pynbna bad kiba shah suba, kaba ailad ïa ki briew kiba don ha madan ban ithuh mardor ïa ki briew shimet ha ki jaka ba bun briew kiba don jingthmu ban leh ïa ki kam thombor.
Ïa kine ki tiar ba lah ban deng yn pynïasoh bad ki Mobile phone ba pyndonkam da ki heh pulit, kaba ai lad ïa ki ban ïoh ïa baroh ki jingkheiñ jingdiah jong ki kam runar kiba lah ban ïoh lyngba katei ka System, la ong u Additional Commissioner of Police (New Delhi) u Devesh Kumar Mahla haba kren bad ki nongpathai khubor.
“Ki ïitkhmat ki dei kiba la pynïasoh bad ki Mobile phone jong ki ophisar, bad ki Mobile phone kin kit ïa ka jingtip ba pura jong ki nongleh kam sniew. Lada don mano mano ba paw ha ka synduk kaba jyrngam, ka pyni shai ba utei u briew um donkti ha ka kam runar. Lada ka synduk ka kylla rong saw, ka mut ba utei u briew u don dak sniew ha ka jingbuh jingthoh jong ki pulit. Ki heh pulit mar mar kin ïoh jingtip kaba bniah bad lada donkam ïa kum une u briew la dei ban kem noh hangto hangto,” la ong u Additional CP Mahla.
U la bynrap, “Kane ka dei ka sien kaba lai jong nga kum u DCP uba pynïaid ïa ki jingrakhe ïa ka Republic Day, bad ha u snem ba la dep nga la sngewthuh ba kam long kaba suk ban kem ïa ki briew kiba suba tang da kaba peit bniah ïa ki lyngba ki Camera ba la buh.
U ophisar u la pynpaw shuh shuh ba kum kine ki ïitkhmat ne ki Smart Glasses ki lah ban Scan ïa ki khmat tang hapoh ki sekhon bad pynïahap ïa ki bad ki rekod ba la buh ha ka jaka treikam khlem da donkam ban peit bniah ïa ka met ne ban pynsangeh ïa ki briew, kaba pynthikna ïa ka jingïaid lynti kaba suk ha ki jaka ba bun briew ha kane ka jingïalang kaba don ka jingïada kaba jur bha.
Nalor ka jingithuh ïa ka dur khmat, ïa kine ki ïitkhmat ba khlaiñ la pyndap da ka jingstad ban ithuh ïa ki dur, ki ban ïarap ïa ki ophisar ban lap ïa ki briew shimet kiba rah ïa ki tiar nar ne ki tiar ïaleh ba la buhrieh.
Kane ka jinglah treikam kan ïarap ban ithuh bad ha kajuh ka por ban buh jingshngaiñ da kaba ong ban ithuh lada don ka jingap jingma ha ka jaka paidbah ne ha ka jaka ba ïalum briew.
“Ngi la pyndonkam ïa kum kane ka teknoloji ha ka por Covid ban peit ïa ka jingshit jingkhriat jong ka met. Ka Thermal Imaging Feature kan ïarap ïa ki ophisar ban lap ïa ki tiar kiba suba ne ki tiar ïaleh kiba lah ban ym ïohi da ki khmat,” ong u Mahla. U la ban jur ba ka AI kaba la tbit bha ka lah ban ithuh ïa ki nongleh kam sniew wat lada ki la pynkylla ïa ka dur ha ki snem kiba la leit noh.
“Kine ki dei ki mar ba la test bha kiba ngi la ai sha ki katto katne phew ngut ki heh sorkar. Ngim pat thied ïa ki ïitkhmat. Ka rukom thied kan shim por, hynrei ïa kine yn pyndonkam ha ki jinglong jingman jong ka aiñ bad ki jingjia kiba donkam ïa ka jingpahara kaba hakhliehduh,” u la bynrap.
Nalor ki Smart Glasses kiba pyndonkam da ka AI, ki pulit jong ka Delhi kin pyndonkam ïa ka jingpeitngor kaba bniah da ki CCTV, ka jingpeit bniah da ki Drone, ka jingpynïasoh ïa ki Software ban ithuh ïa ka dur khmat bad ka jingpeit bniah da ka AI ban pynïaid ïa ki paidbah bad ban lap ïa kiba thmu ban leh ïa ki kam sniew ha kum kane ka por.
