Islamabad, K’lyngkot:
Katkum ki khubor, la ong ba ka jingbun jong ki doktor lane ki nongsumar ki bym pat pyntbit bha, ka la wanrah jingma shibun eh ia ka jinglong- jingman bad ia ki paidbah nongshong shnong jong kylleng ka ri Pakistan, namar wat ha ki tiar sumar kiba dei ban da sumar khuid bha, la lap da ki prek ba la sarang, ki tiar ba la dep sumar shwa ia kiwei bad kiwei- kiwei de ki rukom leh, kiba pyni shai ia ka jinglong ba dang duna jong ki briew ka koit- ka khiah ha katei ka ri.
Da ki phew ngut ki nongpang ki leit sha ki dukan rit kiba don harud surok man ka sngi ha ka thaiñ Sindh kaba Shathie jong ka Pakistan, ha kaba la iohi tang katto- katne tylli ki shuki sawdong ba la pynbeit bad ki miej dieng ba la pyndonkam ban pynthiah ia ki nongpang.
Haba iadei bad kane, la ong ba uwei u nongsumar shimet uba la ithuh kum u Abdul Waheed, u la ong “Kine ki nongpang ki don ka jingngeit ha nga. Ki ngeit ba nga lah ban sumar bha ia ki,” bad u la plie ia kawei ka jaka sumar ha ki katto- katne bnai shabar jong ka nongbah Hyderabad.
Ha ka por mynsngi, la ong ba utei u rangbah uba la 48 snem ka rta, u trei ha kawei ka hospital shimet ha Hyderabad. Ha ki por janmiet, u ju wan sha ka shnong jong u Tando Saeed Khan ban peit ia ki nongpang ha ka jaka sumar jong u, da kaba shim dor 300 tyngka ($1) na ka bynta kawei ka jingiasyllok ne jingphah peit bniah.
“Nga la pynlut por haduh katne ha kane ka kam. Nga la iatreilang bad katto katne ngut ki doktor. Da ka jingsngewnguh ia U Blei, nga don ka jingshaniah ban lap ia u nongpang bad ban sumar ia ka jingpang,” la ong u Waheed haba iakren bad ki nongthoh khubor.
Ym don jingthoh, ym don nombar pynrung kyrteng, bad um don bor katkum ka ain ban trei kum u doktor.
U Waheed, uba don ia ka Diploma ha ka homeopathy bad uba la pyndep ia ka jingpule Nursing kaba saw snem, u kren da ka jingsngew skhem ba u lah ban sumar ia kito kiba ngeit ha ka jingsumar jong u.
Hadien ba u la eksamin ia arngut ki khynnah rit, u la kyntu jur ba ki nongpang kin wan sha u da ka mon sngewbha bad shaniah ha ka jinglah jong u.
Kumta, la ong ba bun ki nongsumar ha Pakistan, ki dei kiba shu trei hi kum ka kam lade shimet bad bun ruh ki bym shym la don kot- don sla ne ioh jingithuh na ki bor ba dei khmih bad na ka sorkar.
