Bitar ki sengbhalang na Mawsynram C&RD Block ba kiw ka bai bording

Shillong, Kyllalyngkot 25

Ki sengbhalang kiba hap hapoh ka Mawsynram C&RD Block ki la pynpaw ïa ka jingbitar halor ka jingkiew shiphew shah ka bai bording elektrict.

Ia kane ki sengbhalang ba kynthup ïa ka Federation of Khasi Jaiñtia & Garo People (FKJGP), Hynñiewtrep National Youths Front (HNYF) bad ka Hynñiewtrep Youths Council (HYC) kiba hap hapoh ka Mawsynram  C&RD Block ki la pynpaw hadien ba ki la leit ban ai da ka jingthoh sha u Bah Olan Sing Suiñ, MLA ka Mawsynram bad sha u Bah Pius Shylla, MLA ka Ranikor, ban kyrpad ba kin sngewbha ban ïakren lem halor kane ka kam kaba ïadei bad ka jingsam bording elektrict jong ka Kompani Sai Computer LTD ka kompani ba thymmai.

Ki nongïalam sengbhalang ki la pynpaw ba ka jingsam bording kane ka kompani ka pher bun shah ban ïa ka rukom sam jong ka FEDCO.

U Bah Kyllang Thongni, President ka HNYF u la ong ba ki paidbah jong ka thaiñ ki dangmut ba ka jingwan jong kane ka kompani ba thymmai kan wan ka jingkylla hynrei ka long pynban da khongpong.

U la pynpaw ruh ka jingsngew lyngngoh ba ka Sorkar ka la ai sha katei ka kompani thymmai khlem da ïa syllok bha bad ki nongkitkam paidbah bad khlem da pynlong ïa ka jingïalang paidbah ban pynsngewthuh sha ki paidbah.

Ki sengbhalang  ki la pynpaw ïa ka jingsngewbitar namar ba ka bai bording ka la kiew shispah shah ban ïa kaba rim bad ki la maham ruh ba lada kane ka kompani ka don ïa ka jingmut tang ban wan lute ïa ki paidbah kin nym ailad satia.

U Bah Kyllalng u la kdew ruh ba hadien ka jingwan shimti jong kine ki kompani kim shym la ïoh jingmyntoi eiei ruh em.

“Kaba pynduh nong bad pynduh jingmyntoi eh ïa ki paidbah ka long ba ka skhim kiba ka Sorkar Pdeng ka pyntreikam, kita ki skhim baroh ki duh lut,” u la ong.

Kumta u la ong ba ki shaniah ha ki nongmihkhmat halor kane ka kam ba kin rah ban ïakren bad ka Sorkar Jylla.