Shillong, K’Lyngkot 25
U Bah Hally War na ka shnong Siej, Sohra, Meghalaya u la ïoh ïa ka khusnam ‘Padma Shri Award’ 2026 na ka bynta ka jingnoh synñiang jong u sha ki kam na ka bynta ka imlang-sahlang bad ka jingpynneh-pynsah ïa ka mariang, khamtam ha kaba ïadei bad ka jingkyntiew ïa ki jaka khlaw bad ka jingpynneh-pynsah ïa ki rukom treikam tynrai.
Kum u briew uba don ka jingnang-jingstad tynrai hynrei u bym pat ïoh ïa ka jingithuh, u la ïoh ïa ka khusnam ‘Padma Shri’ na ka bynta ka jingnoh synñiang jong u ban pynneh-pynsah bad kyntiew ïa ki kam (bioengineering) tynrai jong ki jaidbynriew Khasi.
Lyngba ka jingtrei jong u baroh shi jingim na ka bynta ka jingthaiñ ïa ki tynrai dieng ban shna ïa ki jingkieng-jri ha East Khasi Hills, u la pynneh ïa ka rukom treikam kaba hyndai bad u la pynkhlaiñ ïa ki jingïadei ha ka imlang-sahlang, kyntiew ïa ka bor jong ka mariang ban ïaineh bad ban kyntiew ïa ka kam jngohkai kaba lah ban neh.
Da kaba ai jinghikai ïa ki longïing ha kane ka jaka ha kaba ïadei bad ka jingthaiñ ïa kine ki jingkieng-jri bad ka jingsumar ïa ka mariang, ki kam jong u, ki long ka nuksa jong ka jingïaid ryntih lang jong ka kolshor, ka imlang-sahlang bad ka mariang.
U Bah War u dei u nongrep uba rep ïa u kwai, tympew, sohmarit bad ki jait soh bapher-bapher katba u dang bteng ban trei kum u nongsumar ïa ka mariang bad ka jingnang-jingstad tynrai.
Haba pynpaw ka jingsngewnguh jong u halor ka jingïoh ïa kane ka khusnam, u Bah War u la ong, “Kum u nongrep kwai, tympew, sohmarit bad ki jait soh bapher-bapher, ha ka banyngkong eh, nga ai ka jingsngewnguh ïa u Blei uba la plié lad ïa nga ban pdiang ïa kane ka khusnam. Nga dap da ka jingkmen bad ka jingsngewnguh ïa ki briew kiba la jied ïa nga ban ïoh ïa kane ka khusnam.”
Lyngba ki kam ba ïaineh ban kyntiew ïa ki jaka khlaw kiba don nongrim ha ka jingnang-jingstad tynrai, u la noh synñiang bha sha ka jingïaineh jong ka mariang bad ka bha ka miat jong ka imlang-sahlang. Ki kam jong u ki long ka nuksa jong ka jingnang-jingstad tynrai kaba kyrshan ïa ki jingdonkam jong ka mariang ha ka juk mynta.
Ki khusnam ‘Padma Award’ – kiwei na ki khusnam ba halor tam ba ai sha ki ‘riew paidbah ha kane ka ri, ki dei kiba la ai ha ki lai tylli ki thup kyrdan – ‘Padma Vibhushan’, ‘Padma Bhushan’ bad ‘Padma Shri’.
Ïa kine ki khusnam la ai na ka bynta ki kam bapher-bapher kum ka jingsaiñdur, ka kam na ka bynta ka imlang-sahlang, ki kam paidbah, ki kam saian bad ‘engineering’, ka kam khaïi-pateng bad ki kam karkhana, ki kam ai jingsumar, ka thoh katar bad ka kam ai jinghikai, ki kam ïalehkai, bad kiwei-kiwei.
Ïa kine ki khusnam la ai da ka President ka ri India ha ki jingïalang ba ju long ha Rashtrapati Bhawan ha u bnai Lber/Ïaïong man u snem. Na ka bynta u snem 2026, 131 ngut ki ‘riew shimet ki la shah jied na bynta kine ki khusnam, kata 5 ngut ïa ka ‘Padma Vibhushan’, 13 ngut ïa ka ‘Padma Bhushan’, bad 113 ngut ïa ka ‘Padma Shri’.
