Shillong, K’Lyngkot 25
Ka lympung ïalehkai U-12 bad U-14 Football League 2025-26 ba la pynïaid da ka Shillong Sports Association (SSA) ka la nangjam shaphrang ha ka sngi Saitjaiñ ha SSA Stadium kaba ha First Ground, Polo.
Ha ka jingïakhun kaba nyngkong, ka New Challenger ka la pynliem noh ïa ka Diengpasoh SC da 2-0 kol. Kumjuh ka Shillong Lajong FC ka la jop da 2-0 kol ïa ka Laitkyrhong SC. Ka Nongkohlew SC ka la pynliem noh ïa ka Umpling SC da 2-0 kol. Katba ka Mawshbuit SC ka la ïasam mar shi point bad ka Pynthorbah SC hadien ba kim shym la lah ban thep kol haduh kaba kut ka jingïalehkai.
Haba phai sha ka kyrdan ïalehkai jong ka U-14, ka Nongthymmai Nongkynrih SC ka la pynliem noh ïa ka Umlyngka SC da 2-0 kol. Ka Smit ka la jop da 5-0 kol ïa ka Marbisu SC. Ka Mawshbuit SC ka la shah rem da 0-3 kol ha ka Rangdajied United FC.
