Shillong, K’Lyngkot 25
Ka Khasi Students’ Union (KSU) ka pyrshang katba lah ban don ïa ki shnat treikam sha ki Jylla bapher-bapher bad kyntu ruh ïa ki para-doh para-snam ba kin pynrung kyrteng bad ka seng haba ki mih ban leit trei ne leit pule shabar khnang ba lada jia kaei-kaei kaba sniew kan pynsuk ban ïoh ki lad jingïarap.
Ïa kane la pynpaw da u samla Donald V Thabah General Secretary ka KSU haba ïoh ban kylli haba ïadei ka jingkynnoh ba kawei ka Samla Khasi ba na Ri-Bhoi District ka la shah thombor bad shah shoh ha ki katto katne ngut ki shynrang ha ka jaka sah jongka ha Nongbah Delhi.
U samla Donald u la ong ba kum kine ki jingjia ki dei kiba la ju na ka por sha ka por bad bunsien bha ki la ïai-jia ha ki samla Khasi ba ki shah kular ban ai kam kum sha Delhi, Bangalore, Chennai bad ha kiwei de ki Jylla ka Ri India, katba da la leit pat ki samla Khasi ki shah pynngop ha ki kam awria bad kiwei kiwei kam kiba sniew.
Shuh-shuh u la ong ba ha ki snem ba la dep ka KSU ka la pynlait kyrwoh ban kyntu ba ki samla Khasi kiba leit trei ne pule shabar, lada ki don jingsngew artatin ki lah ban kynjoh ktien ïa ki nongïalam ka seng namar ka don ïa ki shnat treikam kum ha Delhi Unit, Dehradun Unit bad kiwei khang ba kin ïoh ban wat jingtip bha bad ban lait na ka jingshah thok.
U Samla Donald u la ïathuh ba katei ka samla ba na Ri-Bhoi ka la poi suk sha la ïing da ka jingïarap la KSU Delhi Unit bad ka Special Police Unit For North-Eastern Region (SPUNER)
Kum ban shu kdew ka KSU Delhi Unit ka la ïoh pdiang ïa ka jingïakyrpad jingïarap (distress call) na kawei ka khynnah kynthei na Meghalaya ha ka 21 tarik u Kyllalyngkot ba ka la shah thombor bad shah shoh ha ki katto katne ngut ki shynrang ha ïingsah jongka ha Delhi.
Shuh-shuh ka KSU Delhi Unit ka la pyntip sha ka SPUNER bad ryngkat bad ki pulit ka Malviya Nagar ki la poi sha katei ka jaka bad ïoh ban pyllait im ïa katei ka khynnah na kane ka jaka.
Ka KSU lyngba u Samla Donald ka kyrpad ïa ki para-doh para-snam ba kin husiar haba ki thmu leit pule ne wat kam shabar khnang ban lait na ka jingshah pynbiej namar ha kine ki sngi ki bun bha ki agency kiba kulai ban ai kam bad ban ai jaka pule, katba ha ka jingshisha ki shu pynbiej.
