Shillong, K’Lyngkot 25
U nongïalam ka Khasi Studen Union (KSU) u la ong ba ka lada Sorkar Pdeng ka lah ban ai jingmynjur ban pyntreikam ïa ka Inner Line Permit (ILP) ha kiwei ki Jylla balei yn hap ban pyntrei kam ïa kita ki kyndon kiba ïa syriem kum ka ILP, pyntrei kam beit da ka ILP.
Ïa kane u Samla Lambokstarwell Marngar u kren haba kren sha ki nongthoh khubor ha sngi Saitjaiñ hadien ba wai ka jing-ïalang CEC ka KSU kaba la long ha Community hall NEHU.
U Samla Lambok u la ong ba “Wat tang ka Meghalaya Residents Safety and Security Act (MRSSA) kaba la long la aiñ naduh u snem 2016 ruh ka Sorkar ka la leh khun jakai, sa kata ka kyndon ba ïasyriem lei ngim tip kaba kumno kata, hynrei nga sngew ban ong, lada ha kiwei ki Jylla la lah ban pyntrei kam ïa ka ILP, balei kwah ban pyntreikam da ka kyndon kaba ïasyriem kum ka ILP ha ka Jylla Meghalaya, la dei ban pyntreikam beit da ka ILP kaba long shisur shidur beit.”
Shuh-shuh u la ong ba kine kiei-kiei ki dei ki jingbym mon jong ka Sorkar Jylla ne ka Sorkar India bad ïa kane dei tang ma ki hi ban lah ban jubab, ka seng kan kan ïai-bteng ban dawa ba dei ban pyntrei kam ïa ka ILP hapoh ka Jylla Meghalaya bad katba ym pat ïoh ïa ka ILP ruh ka Sorkar Jylla ka dei ban pyntrei kam ïa ka MRSSA khnang ba kan wanrah ïa ka jingïada na ka jingwan rung kyrthep ki bar Jylla.
Haba jubab ïa ki jingkylli u Samla Lambok u la buh kylli ïa u Myntri Rangbah, kaei kata ka kyndon ba ïasyriem jum ka ILP bad haei uta u Myntri Rangbah u pyni ïa ka ‘Blueprint’ haba ïadei kata ka kyndon, hato ngin shuh hun tang na kaba la thoh ha ki kot khubor, Ngi hap ban ïashai shuwa ïa kata bad ngin sa peit ka long kumno kata kaba u Myntri Rangbah u thmu pyntreikam ha ka Jylla Jong ngi,” la ong u samla Lambok.
Haba ïadei ka jingwan rung be-aiñ ki briew ba nabar u samla Lambok u la ong ba ha kine ki sngi ym dei shuh ka jingkhaïi mar ban pynpoi sha Bangladesh, hynrei ki don ki briew kiba pynpoi ïa ki briew sha ka Jylla, halor kane u la ong ba ka seng ka la bthah ïa ki shnat treikam ban long kiba peitngor bad lada lap ba ki paradoh parasnam ki don bynta ha kane ka kam ka seng kam bynse ban ai jingsneng da kaba tyngeh.
“Katba ngi dang ïakhun ban khang ïa ka jingwan rung ki mynder ha ka Jylla hynrei ki dei ki briew jong ngi hi kiba pynkharoi ïa kita ki bar Jylla khamtam hapoh ka bri u Hynniewtrep baroh kawei, namar kata ngi kyntu ïa kum kine ki briew ban sangeh shisyndon namar lada ki lap kaei ban jia ïa ki ym lah ban tip,” la ong u samla Lambok.
