Sha ka VPP ud ka Shnong Borghat bym lah pyndep ban shna ka surok & kynroh

Shillong, Kyllalyngkot 25

Ka roi ka par, ka dei ka jingdonkam ha man la ki shnong la ka long ha sor ne ha nongkyndong bad lada ka Sorkar ka kren ban kyntiew khamtam ha ki jaka nongkyndong hynrei haba pyntrei pat kum ïa ki projek surok khlem da pyndep ka long pat kaei-kaei kaba pynsngewsih ïa ki nongshong shnong kumba long ha ka shnong Borghat ha East Jaiñtia Hills District.

Ka Sorkar Jylla ka plie paidbah ïa ka jingkieng ha Borghat ban pynïasoh bad ka shnong Dawki ha u snem 2019, da u Bah Prestone Tynsong, Symbud Myntri Rangbah ka Jylla, uba dei ruh u Myntri ba dei khmih ïa ka tnad PWD (Roads) hynrei ka la long pynban kaba pynduh mynsiem ïa ki nongshong shnong hadien ba ki nongïalam ka dorbar shnong Borghat, ki la lap ba ka la don ka jingpyndonkam bakla ïa ka pisa kaba la mang na bynta katei ka projek, lyngba ka jingwad RTI jong ki.

Ïa kane ka projek la mang pisa lyngba ka Rural Infrastructure Development Fund Tranche 15 (RIDF XV) ha ka jinglut kaba 26 klur 26 lak 19 hajar tyngka ïa kaba la mang na bynta ka jingkieng kaba 180 mitar ba kynthup ruh ïa ka surok kaba 1.20 kilomitre nalor ka jingker kynroh.

Hynrei la lap ba pyndep tang ïa ka jingkieng ha ka jinglut kaba 19 klur 2 lak 98 hajar 456 tyngka katba ïa ka surok nalor ki jingker kynroh pat kaba la mang 7 klur 23 lak 20 hajar 766 tyngka haduh mynta ym pat pyndep satia. 

Ha ka jingsngew kutlad, ka Dorbar Shnong Borghat, ka la pynsngew ïa kane ka jingeh sha ki nongïalam ka Voice of The People Party (VPP) East Jaiñtia Hills District bad ha ka 23 tarik u Kyllalyngkot, 2026, na ka liang ki nongïalam shnong ba kynthup ïa u Bah Kyrmenlang Swer, Rangbah shnong, u Bah Jewelson Swer, Secretary Shnong, ha ryngkat ki nongïalam ka VPP ki la poi sha katei ka jaka ban pynlong ïa ka jingjurip kaba bniah. 

Ha ka jingïakren bad u Bah Kyrmenlang Swer, u la ong ba watla ki la pyrshang ban pynsngew ïa kine ki jingeh sha ki bor ba dei khmih nalor ka MLA ka thaiñ, ka Kong Santa Mary Shylla  hynrei haduh mynta kim ïoh satia ïa ka jubab kaba shai.

Nalor kata u la ong ruh ba  ka Sorkar ka ong ban kyntiew ïa ka kam jngohkai ha ki thaiñ nongkyndong hynrei lada ka long sah kumne, kumno ka ïoh ka kot kan kiew bad ban pynpaw ba lada kam leh ei-ei, kim banse ban leit sha Iingkashari.

Na ka liang u Bah Damewanhi L. Rymbai, President ka VPP East Jaiñtia Hills, u la ong ba haba pyntrei ïa kino kino ki projek, ka Sorkar ka dei ban pyndonkam hok ïa ka mang tyngka khnang ba kan ym long ka jingduhnong ïa ki nongshong shnong.

U la ong ruh ba na ka liang ka seng kan sa leit ban ïa kynduh ïa u Symbud Myntri Rangbah u Bah Prstone Tynsong ban ïakren halor kane ka mat.