Shillong, K’Lyngkot 25
U Myntri Rangbah ka Jylla, u Conrad K. Sangma u la ai khublei ïa u Bah Hally War na ka shnong Siej, East Khasi Hills halor ka jingshah pynkup burom jong u da ka khusnam ‘Padma Shri Award’ 2026 na ka bynta ka jingnoh synñiang ba radbah jong u ha ka kam sha ka imlang-sahlang bad ka jingpynneh-pynsah mariang, khamtam ha ka ban pynneh-pynsah ïa ka jingstad tynrai jong ka jaidbynriew Khasi lyngba ki jingkieng-jri.
“Da ki phew snem, u la aiti ïa la ka jingim ban pynheh-pynsan bad ban shna ïa ki jingkieng-jri, ban long u nongrah ktien ba shisha jong ka pateng (jong ngi), ki riti-dustur, bad ka jingim ba ïaineh jong ngi,” ong u Sangma ha ka jingthoh jong u ha ka rynsan lad pathai ha ka Sngi U Blei.
U Bah War, uba la sdang ban shna ïa kine ki jingtei ha ka rta kaba 10 snem, u la don ka bynta kaba kongsan ha ka ban pynneh-pynsah ïa ka rukom tynrai kaba pynïasoh lang ïa ka mariang, ka jingstad, bad ka jingstad jong ka imlang-sahlang.
Ka kam jong u ka la pynskhem ïa ki jingïadei ha ka imlang-sahlang, ka la pynbha ïa ka jinglah ban ïaleh pyrshah jong ka mariang, bad ka la kyntiew ruh ïa ka kam jngohkai pyrthei kaba neh ba sah.
“Nga kynmaw ïa ka jingïakynduh bad u Bah Hally ha Siej ha ka por ba nga leit ïaid sha ki jingkieng-jri, ha kaba nga la tip ba u la sdang ban shna ïa kine ki jingtei kiba phylla ha ka rta kaba dang shiphew snem. Ka jingtip ba jylliew jong u, ka jingburom kaba jylliew ïa ka mariang, bad ka mynsiem ba noh sha imlang-sahlang kaba khlem artatien ka pynlong ïa u, u nongïoh pdiang uba dei hok ban ïoh ïa kane ka jingai burom. Ka jingaikhublei ïa phi Bah Hally!” ong u Myntri Rangbah.
