Hyderabad, K’lyngkot:
U president ka BJP hapoh ka jylla Telangana u N Ramchander Rao ha kine ki khyndiat sngi ba la leit, u la pynbna ïa ka jingthmu jong ka seng jong u ban pynlong san tylli ki jingïalang paidbah, kawei na ka bynta man la ki ar tylli ki distrik barim, ha kaba ka jingïashim bynta lang jong ki heh nongïalam jong ka ri hashwa ka ilekshon Municipal bad ka ilekshon ha Greater Hyderabad.
Ha ka jingïakynduh bad ki nongkitkam jong ka seng ha ka jylla, u Ramchander Rao u la bishar bniah ïa ka jingtreikam jong ki komiti bapher bapher jong ka jylla ha kine ki saw bnai.
Ka jingïalang ka la ïakren ruh ïa ka jinglong jingman jong ka saiñ pyrthei mynta bad ïa ka jingkhlaiñ jong ka seng ha ki Municipal bad ki Municipal Corporation bad kiwei kiwei ki mat.
Haba ïakren ïa ki prokram bapher bapher ban leh da ka seng BJP ha kaba ïadei bad ka ilekshon Municipal ban wan, u Ramchander Rao u la bthah ïa ki nongtrei bad ki nongïalam jong ka seng ban pynpaw pyrthei bha ïa ki skhim sorkar pdeng kiba la pyntreikam ha ki jaka naduh tynrai.
