Shillong, K’Lyngkot 27
Ka Dorbar Mang Tyngka ne Budget Session jong ka Meghalaya Legislative Assembly kaba 11, kan sdang naduh ka 16 tarik u Rymphang haduh ka 27 tarik u Rymphang.
Ha kane ka dorbar kaba 10 sngi, la mang 7 sngi na ka bynta ka Government Business bad 3 sngi ïa ka Private Members’ business.
U Lamphang ka ïingdorbar thawaiñ ka Jylla u Thomas A Sangma ha ka Sngi Ba-ar u la ong, ïa katei ka tarik ban pynlong ïa ka Dorbar la dep ban mynjur da ka Business Advisory Committee (BAC).
“Ngin shong 10 sngi pura ïa ka dorbar, 3 sngi la mang na ka bynta ka Private Members Business bad 7 sngi ïa ka Government Business,” u la ong.
Shuh shuh u la pyntip ruh ba ïa ka Mang Tyngka jong ka Jylla yn wanrah ha ka 20 tarik u Rymphang.
U Lamphang u la bynrap ba ka por shong dorbar lah ban pynjlan lada donkam, ban ailad ïa ki dkhot ba kin ïoh ïashimbynta ha ka ïingdorbar.
U la pyntip ruh ba ha ka sngi ba wanrah ïa ki Supplementary Demand for Grants, ka jingïashong dorbar yn pynjlan haduh ka por 3 baje mynsngi.
Ha ka jingïalang jong ka BAC la wan ïashimbynta da u Symbud Myntri Rangbah ka Jylla uba khmih ïa ka Parliamentary Affairs u Bah Prestone Tynsong, u Nongïalam ka Liang Pyrshah u Dr. Mukul Sangma bad u MLA u Bah Paul Lyngdoh uba la ïashimbynta da kaba shu leh Online.
