Shillong, K’Lyngkot 27
Ka Jingaseng Samla Balang Presbyterian Lyngkyrdem da ka jingthmu ban pynmih pisa ban tei pyndep ïa ka ïngmane jong ka Balang, ka Seng Samla ka la pynlong da ka Gospel Musical Evening ha ka janmit jong ka sngi Thohdieng ka ba dei ka 23 tarik Kyllalyngkot 2025.
Ka seng samla ka la pynlong ïa kane ka Gospel Musical Evening ha Madan Personlah ïewduh Lyngkyrdem bad la wan ban plie da u MLA ka Nongpoh Constituency u Tbn Mayralborn Syiem ha ka jingdon ryngkat lang u Bah A.B. Budon Chairman Jingïaseng Samla, ki tymmen Basan jong ka Balang Lyngkyrdem bad kiwei dei ki riew rangbah.
Haba kren kum u kongsan u Tbn Mayralborn u la pynkynmaw ïa ki kyntien jong u myllung ba khraw ka Jaitbynriew Khasi u myllung Soso Tham, kaba u la ong ba “Khmih samla ba phin tip shano ban phai, u don u khlur u ban lam lynti, im ka kyrteng sah ka nam”
U la bynrap ba u myllung Soso Tham u dei u ba la ïohi jngai ïa ka jingnoh synniang jong ki khun samla. “Ka rta jong ka jinglong samla ka dei ka por ba kmen, ka rta ba ngi dang khlaiñ ha ka bor-met bad ka bor pyrkhat” u la ong.
U la ai ka jingïaroh ïa ka Seng Samla ïa ki kam ba ka la leh, kumjuh u kyntu ruh ïa ki nongïalam ka jingïaseng samla ba kin ïalam ïa ki khun hep kiba rit ha ka lynti ba dei kiba long ruh ka lawei bad ki per sara jong ka Balang.
U la ai ka jingkitbok kitwriang ïa ka Jingïaseng Samla Lyngkyrdem ba kan dang lah ban shakri khambha ha ki sngi ki ban dang wan ba ka Balang kan dang kiew ha ki liang bapher-bapher.
